Xitoy 78 milliard tup daraxt ekdi, ammo endi buning salbiy oqibatlarini ko‘rmoqda

Xitoy tarixdagi eng yirik ekologik loyihalardan birini amalga oshirdi va Jazoir kattaligidagi hududga daraxt ekdi, deb xabar berdi Wirtualna Polska.

1980-yillardan beri uning hududida 78 milliardga yaqin yangi daraxtlar paydo bo‘ldi. Biroq Tyanjin, Utrext va Xitoy qishloq xo‘jaligi universitetlari olimlarining tahlili shuni ko‘rsatadiki, «Buyuk yashil devor» jiddiy nojo‘ya ta’sirlarni keltirib chiqargan.

Tadqiqotchilarning fikricha, ommaviy ko‘kalamzorlashtirish mamlakat hududining 74 foizini egallagan sharqiy va shimoli-g‘arbiy hududlarda suv resurslarining keskin kamayishiga olib keldi.

Tadqiqot mualliflarining ta’kidlashicha, yangi o‘rmonlar evapotranspiratsiya jarayonini kuchaytirgan - bu tuproqdan suvning bug‘lanishi va o‘simliklar tomonidan uning ajralib chiqishi kombinatsiyasidir. Oqibatda, namlik Tibet platosiga ko‘chdi va aholi zich joylashgan Sharqiy Xitoyda suv tanqisligiga olib keldi. Masalan, o‘tloqlarning o‘rmonga aylanishi «bug‘lanish va yog‘ingarchilikni ko‘paytirdi, lekin shu bilan birga suv muvozanatini yomonlashtiradi».

Ma’lumotlarga ko‘ra, Xitoyning shimolida aholining 46 foizi, ammo suv zaxiralarining atigi 20 foizi to‘planganligi sababli muammo yanada keskinlashmoqda.

Olimlarning xulosalarida ta’kidlanishicha, «Xitoyda o‘rmonlarni qayta tiklashning keyingi dasturlari butun mintaqalarni ichimlik suvi va qishloq xo‘jaligi resurslaridan mahrum qilmaslik uchun gidrologik siklning o‘zgarishini hisobga olishi kerak».