Jamoatchilik muhokamasiga qo‘yilgan Vazirlar Mahkamasi qarori loyihasi bilan O‘zbekiston fuqarolarining xorijiy mamlakatlarga sayohatlarini tartibga solish va chiqish turizmi sohasida ularning huquqlarini kafolatlash tizimini yanada takomillashtirish nazarda tutilgan.
Loyihaga muvofiq, Turizm qo‘mitasi huzurida yuridik shaxs maqomiga ega bo‘lmagan «Xavfsiz turizm» jamg‘armasi tashkil etilishi rejalashtirilmoqda. Chiqish turizmi sohasida faoliyat yurituvchi turoperatorlar litsenziya olish uchun ushbu jamg‘armaga kamida 50 ming AQSh dollari ekvivalentidagi mablag‘ni zaxira qilib qo‘yishi lozim bo‘ladi.
Mazkur mablag‘lar turoperator yoki turagentning harakati yoki harakatsizligi oqibatida turistlarga yetkazilgan moddiy zararni qoplash, shuningdek, favqulodda vaziyatlarda fuqarolarni vaqtincha joylashtirish, evakuatsiya qilish, repatriatsiya qilish hamda boshqa zarur xarajatlarni moliyalashtirish uchun yo‘naltiriladi.
Loyihada, shuningdek, har bir sotilgan turistik mahsulot bo‘yicha maqsadli kafolat yig‘imini joriy etish taklif qilingan. Uning miqdori turistik mahsulot sotilgan kundagi bazaviy hisoblash miqdorining 0,15 baravari etib belgilanishi rejalashtirilgan. Bu yig‘im turistik mahsulot narxi tarkibiga kiritiladi va turistdan alohida to‘lov sifatida undirilmaydi.
Yana bir yangilik sifatida turkod tizimini joriy etish taklif etilmoqda. Milliy turizm platformasi orqali shakllantiriladigan mazkur unikal elektron identifikatsiya raqami turistik mahsulot rasmiy ro‘yxatdan o‘tgani, kafolat yig‘imi to‘langani hamda turist kafolatlash tizimiga kiritilganini tasdiqlaydi.
Loyihada chet el turoperatorlarining O‘zbekiston fuqarolari uchun turistik paketlarni sotishiga ham qo‘shimcha talablar belgilangan. Ular faqat litsenziyaga ega mahalliy turoperator orqali yoki O‘zbekistonda tashkil etilgan va litsenziya olgan yuridik shaxsi orqali faoliyat yuritishi mumkin bo‘ladi. Shuningdek, turagentlarga chet el turoperatorlari mahsulotlarini mahalliy litsenziyalangan turoperator ishtirokisiz to‘g‘ridan-to‘g‘ri sotish taqiqlanishi taklif etilmoqda.
