Xitoyda Monjaro nomi bilan mashhur bo‘lgan yangi Geely Xingyee L Plus avtomobilining ilk suratlari namoyish qilindi. Avtomobil kattalashgan, biroq o‘ziga xos dizayn xususiyatlarini saqlab qolgan.
Xitoyning Sanoat va axborotlashtirish vazirligi Yevropa bozorida Monjaro nomi bilan tanilgan Geely Xingyee L Plus krossoverining dastlabki suratlari va texnik ma’lumotlarini e’lon qildi.
Yangi modelning gabaritlari hozirgi versiyanikidan kattaroq: avtomobilning uzunligi 4955 mm (160 mm ga uzunroq), eni - 1960 mm, balandligi - 1769 mm.
Dizayn model qatorining o‘ziga xos xususiyatlarini saqlab qolgan: old qismida vertikal xromlangan unsurlarga ega massiv radiator panjarasi, orqa qismida esa yukxona qopqog‘i bo‘ylab yaxlit chiroq chizig‘i bilan birlashtirilgan cho‘zinchoq fonarlar ko‘zga tashlanadi. Ranglar palitrasida kuzovni ikki rangga bo‘yash opsiyasi ham paydo bo‘ladi - uning uslubi Mercedes-Maybach yechimlarini yodga soladi.
Dvigatel ikki variantda taqdim etilgan:
- benzinli versiya - quvvati 290 ot kuchiga teng 2 litrli turbomotor;
- gibrid modifikatsiya - xuddi shu dvigatel, lekin 218 ot kuchi quvvatga ega.
Bazaviy komplektatsiyaga diametri 20 va 21 dyuymli g‘ildiraklar kiradi - xaridorlarda tanlash imkoniyati bo‘ladi.
Modelning batafsil tavsiflari va sotuvlar boshlanish sanasi rasmiy premyeraga yaqinroq ma’lum bo‘ladi.
