AQShning Kaliforniya shtatidagi Monterey shahrida o‘tgan avtomobil haftaligi doirasida Land Rover 2026-yilgi «Dakar» rallisida g‘olib chiqqan D7X-R poyga mashinasining umumiy yo‘llarga mo‘ljallangan versiyasi – yangi Defender Dakar’ni taqdim etdi. Ushbu model brendning modellar qatoridagi eng ekstremal va qudratli Defender bo‘lib, unda poyga avtomobiliga xos bir qator yechimlar qo‘llaniladi.
Kapot ostiga 626 ot kuchi va 750 Nm aylanma momentga ega 4,4 litrli, qo‘sh turbokompressorli V8 benzin dvigateli o‘rnatilgan. Quvvati bo‘yicha u hatto poygachi D7X-R’dan ham ustun turadi, biroq undan farqli o‘laroq, Defender Dakar umumiy foydalanishdagi yo‘llarda harakatlanish uchun mo‘ljallangan.
Asosiy o‘zgarishlar shassiga kiritildi. «Pnevmopodveska» o‘rniga bu yerga yo‘ltanlamasda tez yurishga moslashtirilgan Bilstein prujinalari va amortizatorlari o‘rnatilgan, 35 dyuymli yo‘ltanlamas shinalari esa 20 dyuymli zarblangan disklarga o‘rnatilgan.
Avtomobilga ralli uchun mo‘ljallangan Defender’dan qum va shag‘alda harakatlanish uchun maxsus rejimlar hamda g‘ayrioddiy «parvoz rejimi» o‘tgan. Bu rejim sakrashdan so‘ng, yerga tushish paytida «podveska»ning ishlashini maxsus sozlab, haydovchiga qariyb uch tonnalik yo‘ltanlamasni haqiqiy parvozga «yo‘naltirish» imkonini beradi.
Tashqi ko‘rinishi ham poyga avtomobilini imkon qadar yodga soladi: karbon kapot, qo‘shimcha havo yutgichlar, tomdagi fonarlar va Dakar’ning o‘ziga xos ranglari. Salonga sport o‘rindiqlari, to‘rt nuqtali xavfsizlik kamarlari o‘rnatilgan va 2+2 o‘rindiqlar sxemasi qo‘llanilgan.
Hozircha Land Rover faqat ehtimoliy xaridorlardan buyurtmalar qabul qilmoqda. Narxlar, aniq adadi va to‘liq texnik tavsiflari 2027-yil yanvar oyida «Dakar» rallisi paytida e’lon qilinadi, shundan so‘ng rasmiy buyurtmalar ochiladi.
