2026-yil 1-avgust holatiga Oʻzbekistonda muomaladagi bank kartalari soni 75,7 million donani tashkil etdi. Joriy yilning 1-yanvar holatiga bu koʻrsatkich 68,3 millionta edi.
Shu tariqa, yetti oy davomida muomalaga qoʻshimcha 7,4 millionta bank kartasi chiqarildi. Kartalarning umumiy soni yil boshiga nisbatan 10,9 foizga koʻpaydi.
Toʻlov infratuzilmasi ham kengayishda davom etmoqda. Xususan, oʻrnatilgan toʻlov terminallari soni 430,8 mingtadan 453,5 mingtaga yetdi. Yetti oy ichida qoʻshimcha 22,7 mingta terminal ishga tushirilib, ularning soni 5,3 foizga oshdi.
Bankomat va infokiosklar tarmogʻida oʻsish yanada yuqori boʻldi. Yil boshida ularning soni 40,1 mingtani tashkil etgan boʻlsa, 1-avgustga kelib 47 mingtaga yetdi. Bu 17,3 foizlik oʻsishni anglatadi.
Shu bilan birga, toʻlov terminallari orqali amalga oshirilayotgan operatsiyalar hajmi sezilarli darajada oshgan. 2026-yilning yanvar–iyul oylarida terminallar orqali tushgan tushumlar 387,4 trln soʻmni tashkil qildi.
Taqqoslash uchun, 2025-yilning toʻliq 12 oyi davomida toʻlov terminallari orqali 460,3 trln soʻm tushum qayd etilgan edi. Demak, joriy yilning dastlabki yetti oyidayoq oʻtgan yilgi yillik koʻrsatkichning qariyb 84 foiziga teng aylanma shakllangan.
Ayni paytda kartalar soni 10,9 foizga koʻpaygan boʻlsa, terminallar orqali aylanma 44,3 foizga oʻsgan. Bu bank kartalaridan foydalanish faolligi ham ortib borayotganini koʻrsatadi.
Xususan, bitta bank kartasiga toʻgʻri keladigan oʻrtacha oylik tushum 562 ming soʻmdan 731 ming soʻmgacha oshgan. Bu koʻrsatkich naqd pulsiz hisob-kitoblar aholining kundalik xarid va toʻlovlarida tobora kengroq oʻrin egallayotganini koʻrsatadi.
