Oʻzbekistonda davlat oliy taʼlim muassasalariga qabulda vakant qolgan oʻrinlar uchun qoʻshimcha tanlovda ishtirok etishni xohlovchilarni roʻyxatga olish boshlandi. Bu haqda Bilimni baholash agentligi xabar berdi.
Agentlikka koʻra, bakalavriat taʼlim yoʻnalishlariga kirish imtihonlarida ishtirok etib, belgilangan minimal 56,7 ball va undan yuqori ball toʻplagan, biroq talabalikka tavsiya etilmagan abituriyentlarga, shu jumladan, roʻyxatdan oʻtishning ikkinchi bosqichida oliy taʼlim tashkiloti va bakalavriat taʼlim yoʻnalishlarini tanlamagan abituriyentlarga vakant oʻrinlar mavjud boʻlgan, fanlar majmuasi va taʼlim tili mos bakalavriat taʼlim yoʻnalishlari boʻyicha qoʻshimcha tanlovda ishtirok etish imkoniyati yaratildi.
2026-yil 22-avgustdan 28-avgustga qadar (shu kuni ham) my.uzbmb.uz rasmiy platformasi orqali mazkur toifadagi abituriyentlar qoʻshimcha tanlovda ishtirok etish uchun roʻyxatdan oʻtishlari mumkin.
Abituriyentlarga fanlar majmuasi va taʼlim tili mos boʻlgan, vakant oʻrinlar mavjud bakalavriat taʼlim yoʻnalishlarini tanlash huquqi beriladi.
Roʻyxatdan oʻtgan abituriyentlar vakant oʻrinlarga toʻplagan ballari ketma-ketligiga qatʼiy rioya qilingan holda, bazaviy toʻlov-kontrakt asosida talabalikka tavsiya qilinadi.
Tanlov yakunlari boʻyicha agentlik tomonidan tegishli tanlov qaydnomalari shakllantirilib, oliy taʼlim tashkilotlariga taqdim etiladi.
Huquqshunos Xushnudbek Xudoyberdiyevga koʻra, vakant oʻrinlar soni 32 mingta. Lekin barcha fanlar majmuasi uchun ham vakant kvotalar mavjud emas. Masalan, platforma tarix va chet tili yoʻnalishida vakant joy yoʻqligini koʻrsatmoqda.
“Siz tanlagan fanlar majmuasi uchun vakant kvota bor boʻlsa ham, lekin siz istagan hududga va oliygohga boʻlmasligi mumkin. Menga Toshkent kerak edi, menga falon oliygoh kerak edi, deganingiz bilan foyda yoʻq. Roʻyxatda qayer chiqsa, oʻshanga bor, chiqmaganiga yoʻq”, – deya qoʻshimcha izoh berdi Xushnudbek Xudoyberdiyev.
Maʼlumot uchun, joriy yilda bakalavriatga 678 ming abituriyent hujjat topshirgan. Shundan 209 mingdan ortigʻi hozirgacha talabalikka tavsiya etilgan, 234 ming nafari esa 56,7 ball yigʻa olmagan.
