Rossiya shaxmat federatsiyasi (RSHF) Rossiyaning erkaklar va ayollar terma jamoalari 15-sentabrda Samarqandda ochiladigan Butunjahon shaxmat olimpiadasida ishtirok etmasligini maʼlum qildi. Ularning musobaqada oʻynashiga ruxsat bermaslik haqidagi qarorni 23-avgust kuni boʻlib oʻtgan yigʻilishida «Rossiya masalasi»ni koʻrib chiqqan Xalqaro shaxmat federatsiyasi (FIDE) kengashi - tashkilotning oliy ijro organi qabul qildi.
Bu Chennay–2022 (Xitoy) va Budapesht–2024 (Vengriya) olimpiadalaridan keyin Rossiyasiz oʻtadigan ketma-ket uchinchi turnir.
2025-yil yanvar oyida FIDE kengashi Rossiya va Belarusning bolalar-oʻsmirlar va paralimpiya jamoalarini rasmiy musobaqalarga qoʻyishga ruxsat bergan, oʻsha yilning iyunida esa Rossiya ayollar terma jamoasining jamoaviy jahon chempionatida ishtirok etishini maʼqullagan edi – yakunda terma jamoa bu musobaqada gʻolib boʻldi. Yaʼni, vaziyat sanksiyalarni yumshatish tomonga ketayotgan edi.
Biroq 2026-yil 10-iyun kuni FIDE Sport arbitraj sudi (CAS) qarorini bajarmagani uchun Rossiya shaxmat federatsiyasining (RSHF) aʼzoligini vaqtincha toʻxtatib qoʻydi. CAS qaroriga koʻra, RSHF Ukrainaning bosib olingan Qrim, Sevastopol, DXR, LXR, Xerson va Zaporojiye viloyatlarida shaxmat faoliyatini boshqarishni hamda tadbirlar oʻtkazishni toʻxtatishi kerak edi.
2026-yil 23–24-avgust kunlari FIDE Prezident kengashi rossiyalik grossmeysterlarni Butunjahon olimpiadasiga qoʻymaslik haqida qaror qabul qildi, deb xabar berdi RSHF ijrochi direktori Aleksandr Tkachyov. Uning soʻzlariga koʻra, kengash aʼzolarining aksariyati Rossiya terma jamoasining ishtirokiga qarshi chiqqan. Tkachyov bu tashabbus FIDE prezidenti vazifasini bajaruvchi Vishvanatan Ananddan chiqqanini taʼkidladi.
Avvalroq FIDE prezidenti vakolatlarini bajarishni toʻxtatgan rossiyalik Arkadiy Dvorkovich iyul oyida Yevropa Ittifoqi unga qarshi sanksiyalar joriy qilganidan soʻng oʻzini chetga olgan edi. Hozir prezident vazifasini Vishvanatan Anand bajaryapti.
