"Paxtakor" klubi jamoa himoyachisi Muhammadrasul Abdumajidovning Fransiya klubiga oʻtishi masalasi boʻyicha ijtimoiy tarmoqlar va OAVda tarqalgan fikrlar boʻyicha rasmiy munosabat bildirdi.
Maʼlum qilinishicha, klubga boshqa xorij klubidan rasmiy taklif yuborilgan xat kelib tushmagan. Futbolchining agenti fransuz klubining sotib olish huquqi bilan ijara taklifini taqdim etgan.
“Biroq bu taklif klubimizni qoniqtirmadi. "Paxtakor" jamoasidagi har bir futbolchining oʻziga yarasha obroʻsi bor va biz oʻyinchilar uchun bildirilgan yaxshi takliflarni koʻrib chiqishga tayyormiz. Qolaversa, Oʻzbekistonda transfer davri yopilgan”, deyiladi rasmiy munosabatda.
Qayd etilishicha, jamoa mavsumning muhim pallasida turibdi va futbolchining oʻrnini toʻldirish imkoniyatiga ega emas.
“Har mavsum oldidan murabbiylar shtabi oldiga jiddiy vazifalar qoʻyiladi va bu yil ham shundan mustasno emas. Futbolchilar oʻtishi va transferlari boʻyicha qarorlar murabbiylar shtabi tomonidan vazifalardan kelib chiqib, jamoa manfaati asosida qabul qilinadi. "Paxtakor"ni oldinda Elit Chempionlar Ligasi kutmoqda. Ushbu musobaqada jamoaning vazifasi munosib ishtirok etishdan iborat.
Shu sababli ayni paytda asosiy maqsadimiz jamoa tarkibini kuchaytirishdan iborat, uni kuchsizlantirish emas”, deya taʼkidlagan klub.
Klubning bildirishicha, agar taklif vaqtliroq kelib tushganda uni batafsil muhokama qilish mumkin edi. “Paxtakor” yozgi transferlar paytida ikki nafar markaziy himoyachi boshqa klublarga qoʻyib yuborilgani tufayli ushbu transfer boʻyicha taklifni faqat qishda koʻrib chiqish imkoni borligini maʼlum qilgan.
