Deniyel Driskoll AQSH Qurolli kuchlarini rivojlantirish yoʻnalishi va qator yuqori martabali ofitserlarni lavozimdan ozod etish masalalarida mudofaa vaziri Pit Hegset bilan bir necha oy davomida kelishmovchiliklarga borgan. Bu haqda The Wall Street Journal manbalariga tayanib xabar berdi. Keyinchalik Reuters va AP ham ushbu maʼlumotni tarqatdi.
NBC News manbalari esa Oq uy Driskollning isteʼfosini qabul qilganini xabar qildi. The Wall Street Journal maʼlumotiga koʻra, u yaqin kunlarda Pentagondagi lavozimini tark etishi kutilmoqda.
Oq uy matbuot kotibining birinchi oʻrinbosari Anna Kelli Driskoll AQSH Quruqlik qoʻshinlari vazirligida Donald Tramp maʼmuriyati dasturini amalga oshirishda samarali ishlaganini bildirgan.
Uning taʼkidlashicha, Driskoll harbiy tayyorgarlik va qurollarning jangovar samaradorligiga ustuvor ahamiyat bergan, shuningdek, Rossiya va Ukraina oʻrtasidagi muzokaralarga koʻmaklashgan.
Driskollning isteʼfoga chiqishi mumkinligi haqidagi xabarlar avvalroq ham tarqalgan edi. The Wall Street Journal 21-avgust kuni u Pit Hegset bilan kelishmovchiliklar tufayli yil oxiriga qadar lavozimini tark etishni rejalashtirayotgani haqida yozgan.
Reuters bahosiga koʻra, Driskollning ketishi Donald Trampning ikkinchi prezidentlik muddati davrida Pentagon rahbariyatining turli boʻgʻinlarida amalga oshirilayotgan kadrlar almashinuvining navbatdagi bosqichi boʻlishi mumkin.
Jumladan, joriy yil aprel oyida AQSH Quruqlik qoʻshinlari shtabi boshligʻi Rendi Jorj hamda qator boshqa yuqori martabali harbiy amaldorlar lavozimidan ozod etilgan edi.
Deniyel Driskoll AQSH vitse-prezidenti Jey Di Vensning doʻsti va sobiq kursdoshi hisoblanadi. U 2025-yil noyabrida Kit Kellog oʻrniga Donald Trampning Ukraina boʻyicha maxsus vakili etib tayinlangan.
Driskoll AQSH Quruqlik qoʻshinlari vaziri lavozimini 2025-yil fevral oyidan buyon egallab kelayotgan edi. Reuters qayd etishicha, u bu lavozimda armiyani qurollantirishda «moslashuvchan yondashuv» tarafdori boʻlib, nisbatan arzon qurol-yarogʻ xarid qilishni qoʻllab-quvvatlagan va yirik qurol ishlab chiqaruvchilarni tanqid qilib kelgan.
