Delfi xabariga koʻra, hozirda Latviya va Rossiya oʻrtasida faqat bitta muntazam avtobus yoʻnalishi saqlanib qolgan. Ushbu yoʻnalishda Ecolines brendi ostida ishlaydigan Norma-A kompaniyasi har kuni reyslarni amalga oshirmoqda.
Kompaniyaga berilgan ruxsatnoma 2027-yil 9-yanvarga qadar amal qiladi. Latviya hukumati uning amal qilish muddatini uzaytirishni rejalashtirmayapti.
Ayni paytda Rossiya va Belarusga nomuntazam avtobuslarda yoʻlovchi tashish Latviyada 2025-yil 1-noyabrdan buyon taqiqlangan. Dastlab ushbu cheklov 2026-yil 31-oktabrga qadar amal qilishi belgilangan edi. Endi rasmiylar uni yana 12 oyga uzaytirishni rejalashtirmoqda.
Shu bilan birga, Latviya Transport vazirligi muntazam avtobus reyslarining bekor qilinishi Rossiya va Belarusga borish imkoniyatini butunlay yopmasligini tan olmoqda. Yoʻlovchilar Estoniya yoki Litva orqali almashib oʻtirish yoʻli bilan bu davlatlarga borishi mumkin. Bundan tashqari, avtobus tashuvlariga oid mazkur cheklovlar mikroavtobuslarga tatbiq etilmaydi.
Latviya rasmiylari kelgusida ham bunday qatnovlarning xavfsizlik, iqtisodiy manfaatlar va mamlakatning xalqaro majburiyatlariga taʼsirini oʻrganishni davom ettirmoqchi. Asosiy maqsad Boltiqboʻyi davlatlari va Yevropa Ittifoqi miqyosida umumiy yondashuvni shakllantirish ekani aytilgan.
Latviya hukumati avval ham oʻz fuqarolariga Rossiya va Belarusga safar qilmaslikni bir necha bor tavsiya qilgan. Mamlakat Davlat xavfsizlik xizmati esa bunday safarlar chogʻida fuqarolar maxsus xizmatlar tomonidan yollanishi xavfi mavjudligidan ogohlantirgan.
Rossiya va Belarus bilan avtobus qatnovlarini toʻliq toʻxtatish rejalari haqida joriy yil may oyida ham xabar berilgan edi. Oʻshanda Ecolines cheklovlar natijasida kompaniyaning toʻgʻridan toʻgʻri yoʻqotishlari yiliga qariyb 4 mln yevroni tashkil qilishi mumkinligini hisoblab chiqqan. Avtobus parkining bekor turishi esa yana yiliga taxminan 2 mln yevro zarar keltirishi mumkin.
Avtobuslar Yevropa mamlakatlaridan Rossiya va Belarusga borishning nisbatan arzon transport vositalaridan biri boʻlib qolmoqda. Biroq yoʻlovchilar chegaradagi tekshiruvlar sababli koʻp soatlik navbatlarga ham duch kelmoqda.
