FIFA prezidenti Janni Infantino tashkilot rahbarligiga navbatdagi saylovlarda oʻz nomzodini qoʻyishini tasdiqladi.
«Albatta, kelasi yilgi saylovlarda nomzodimni qoʻyaman. Mening dasturim yoki shiorim juda oddiy, ammo shu bilan birga juda aniq: «Futbol butun dunyodagi barchaga tegishli». Biz shunga intilmoqdamiz. Men shunga intilmoqdaman», – dedi u.
Infantino bilan bogʻliq mojaro FIFA prezidentining jahon futboli daromadlarini boshqarish tizimini isloh qilish rejalari fonida avj olgandi. Iyul oyi oxirida shveysariyalik mulozim jahon chempionatlari va boshqa yirik turnirlar uchun barcha media, homiylik va boshqa huquqlarni aksiyalarining bir qismini tashqi investorlarga sotish rejalashtirilgan alohida tuzilmaga oʻtkazmoqchi ekani maʼlum boʻldi.
Bu gʻoya darhol juda salbiy qabul qilindi: UEFA turnirlarni boykot qilish bilan tahdid qildi, KONKAKAF, OFK va KONMEBOL ham tanqidiy munosabat bildirdi.
Qator mamlakatlar FIFA rahbarligiga saylovlarda Infantinoni qoʻllab-quvvatlashdan voz kechdi.
