FIFAning amaldagi prezidenti Janni Infantinoga qarshi chiqayotganlar kelasi yili tashkilot rahbarligi uchun boʻlib oʻtadigan saylovda Londonning “Arsenal” klubi sobiq bosh murabbiyi Arsen Vengerni unga raqib sifatida koʻrishmoqda, deb yozadi The Times.
Qayd etilishicha, ular 76 yoshli Vengerni FIFA prezidentligiga saylovda oʻz nomzodini qoʻyishga koʻndirishga umid qilishmoqda.
Venger “Arsenal” tarixidagi eng muvaffaqiyatli murabbiy hisoblanadi. Jamoa uning qoʻl ostida uch marta mamlakat chempioni boʻlgan va yetti marta Angliya Kubogini qoʻlga kiritgan. U 2019-yildan buyon FIFAning futbolni global rivojlantirish boʻlimi boshligʻi lavozimida ishlab kelmoqda.
FIFA prezidentligiga saylov 2027-yilning martida boʻlib oʻtadi. Infantino FIFAni 2016-yildan beri boshqarmoqda va navbatdagi muddatga saylanishni rejalashtirgan. Shuningdek, “Tottenxem” va Shveysariya milliy jamoasi sobiq himoyachisi Ramon Vega ham tashkilot rahbarligiga saylovda oʻz nomzodini qoʻyish istagini bildirgan.
