«Ulkan panda har doim Xitoy va amerikaliklar oʻrtasidagi doʻstlik ramzi boʻlib kelgan. Mana yaxshi yangilik. Bir necha kundan soʻng ikkita panda, Pin Pin va Fu Shuan Atlanta hayvonot bogʻidagi yangi uyiga yetib keladi va Amerika xalqi bilan yuzlashadi», - dedi Si Jinping.
Tramp Si Jinpingni 23-sentabr kuni Vashington yaqinidagi Endryus aviabazasida kutib oldi. Trampning Si Jinping yetib kelganidan soʻng uni shaxsan kutib olish qarori 60 yildan ortiq vaqt davomida amal qilib kelingan diplomatik protokoldan chekinish boʻldi. Gap xorijiy yetakchilarni qabul qilishning shakllangan amaliyoti haqida ketmoqda - Amerika prezidenti, qoida tariqasida, ularni harbiy bazaga uchib kelishi bilan bevosita kutib olmaydi.
Oxirgi bunday holat 1962-yilda, Jon Kennedi baza uchish-qoʻnish yoʻlagida Buyuk Britaniya bosh vaziri Garold Makmillanni kutib olganida sodir boʻlgan.
Si Jinping 23-sentabrdan 25-sentabrgacha AQShda boʻladi. Bu Xitoy rahbarining oʻn yildan ortiq vaqt ichida ushbu mamlakatga ilk davlat tashrifidir.
Panda diplomatiyasi - Xitoyning katta pandani xorijga yumshoq kuch vositasi sifatida yuborish amaliyoti: dastlab bepul davlat sovgʻasi sifatida, 1980–yillarning oʻrtalaridan boshlab esa uzoq muddatli ijara asosida. Hayvonlar Xitoy mulki boʻlib qoladi va ularning boshqa mamlakat hayvonot bogʻida paydo boʻlishi odatda «alohida» yoki yaxshilanayotgan munosabatlardan darak beradi. Katta panda yovvoyi holda faqat Xitoyda yashaydi.
