Oʻzbekistonda kompakt shahar krossoverlari oilasiga mansub yangi model - Kia Sonet Prime savdosi boshlanmoqda. Avtomobil oʻziga xos dizayn, kengaytirilgan jihozlanish va zamonaviy elektron tizimlarga ega boʻlib, amaliy format va sinalgan kuch qurilmasini saqlab qolgan. Shu bilan birga, bozorga tanish Kia Sonet ham model qatorida qoladi: ikki krossover Oʻzbekistonda bir vaqtning oʻzida taklif etiladi.
Har ikki versiya ham ADM Jizzakh zavodida toʻliq siklli CKD texnologiyasi asosida ishlab chiqariladi. Bu Kia kompaniyasining ishlab chiqarishni yuqori darajada mahalliylashtirishga eʼtibori va Oʻzbekiston bozoridagi uzoq muddatli rejalarini namoyon etadi.
Kia’ning zamonaviy uslubidagi yangi qiyofa
Sonet Prime kuzovning old va orqa qismlari toʻliq qayta ishlangan. Model tashqi koʻrinishida Kia’ning zamonaviy uslubi qoʻllangan: murakkab geometriyali radiator panjarasi Star Map LED optikasi va Ice Cube tumanga qarshi chiroqlar bilan uygʻunlashgan.
Orqa tomonda vertikal fonarlar bagajxona eshigining butun kengligi boʻylab joylashgan LED tasma bilan birlashtirilgan. Kompozitsiyani yangi bamper va integratsiyalashgan spoyler toʻldiradi.
Avtomobil 16 dyuymli yengil qotishmali disklar bilan jihozlanadi. Sonet Prime uchun kuzovning yetti xil rangi, shuningdek, qizil yoki oq kuzov va kontrast qora tomga ega ikki rangli variantlar taklif etiladi.
Ikkita katta ekran va interfeysning uchta tili
Salondagi asosiy oʻzgarishlardan biri raqamli haydovchi zonasi boʻldi. Asboblar paneli va multimedia tizimi diagonali 10,25 dyuym boʻlgan displeylar bilan jihozlangan. Asboblar panelida avtomobil va haydovchiga yordam beruvchi tizimlarning ishlashi haqidagi asosiy maʼlumotlar aks ettiriladi, uning dizayni esa tanlangan harakatlanish rejimiga qarab oʻzgaradi.
Multimedia tizimi Apple CarPlay va Android Auto’ni qoʻllab-quvvatlaydi. Interfeys oʻzbek, rus va ingliz tillarida mavjud.
Jihozlanish tarkibiga, shuningdek, yettita dinamik va sabvuferga ega Bose audiotizimi, simsiz quvvatlash tizimi, USB-C va USB-A ulagichlari, iqlim nazorati, Smart Key kalitsiz kirish tizimi, elektr yuritmali lyuk hamda rang va ishlash rejimini tanlash imkoniyatiga ega salonning atmosfera yoritgichlari kiradi.
