Ish 1985-yil 27-fevralda boshlangan. Politsiya boshligʻining xolasi, 57 yoshli Yeva Olesen Provo shahridagi uyida qotillik alomatlari bilan topildi. Ayol vahshiyona tarzda oʻldirilgan, uning uyi ostin-ustun qilib tashlangandi.
Tergov 29 yoshli Duglas Karterga borib taqaldi. Hibsga olingandan soʻng, u qotillikni tan olish toʻgʻrisidagi koʻrsatmani imzolagan, biroq keyinchalik bu iqrorlik bosim ostida boʻlganini daʼvo qilgan.
Shu bilan birga, Karterni jinoyat joyi bilan bevosita bogʻlaydigan ashyoviy dalillar topilmagan. Ayblov asosan uning iqroriga hamda er-xotin Epifanio va Lusiya Tovar koʻrsatmalariga asoslangan edi. Ular Karter qotillik haqida soʻzlab berganini taʼkidlashgan.
1985-yilda Karter aybdor deb topilib, oʻlim jazosiga hukm qilindi.
Biroq oradan yillar oʻtib, er-xotin Tovarlar avvalgi koʻrsatmalaridan voz kechdi. Ular qasam ichib, politsiya ularga bosim oʻtkazib, Karterga qarshi yolgʻon koʻrsatma berishga majburlaganini aytishdi. Keyingi sud jarayonlari materiallarida ham politsiya tomonidan guvohlarga moliyaviy yordam koʻrsatilgani haqida maʼlumotlar paydo boʻldi.
2022-yilda sud Karterning ayblov va oʻlim hukmlarini bekor qildi. 2025-yilda Yuta shtati Oliy sudi bu qarorni oʻz kuchida qoldirdi. Sud tergov tomonidan asosiy guvohlar bilan muomala qilish va himoyachilarga maʼlumotlarni oshkor qilmaslik bilan bogʻliq koʻplab qoidabuzarliklarga eʼtibor qaratdi. Karterga nisbatan yangi sud jarayoni belgilandi.
Ammo 2026-yil sentyab oyida yana bir muhim voqea yuz berdi.
Prokuratura takroriy DNK tekshiruvi natijalarini oldi. Ushbu natijalar Karterni marhum ayolning uyidagi eshik tutqichidan topilgan qon manbai sifatida istisno qildi. Shuningdek, uning Yeva Olesenga zarba berilgan pichoq dastasidan topilgan genetik materialning manbasi emasligi maʼlum boʻldi.
Shundan soʻng, prokuratura yana oʻlim jazosini soʻrash niyatidan voz kechdi va Karterni jinoiy javobgarlikka tortish masalasini qayta koʻrib chiqish zarurligini maʼlum qildi.
28-sentabr kuni sudya unga taxminan 41 yillik qamoqdan soʻng garov evaziga ozodlikka chiqishga ruxsat berdi. Yangi sud jarayoniga qadar Karter GPS–treker taqib yurishi va marhum ayolning qarindoshlari bilan muloqot qilmasligi shart. Yangi sud jarayoni 2027-yil 26-iyulga belgilangan.
