DW xabariga koʻra, uchrashuv 29-sentabr kuni Vashingtondagi Oq uyda boʻlib oʻtgan. Unda Google, Anthropic, Meta, OpenAI, Nvidia hamda Ilon Maskka tegishli xAI kompaniyalari rahbarlari ishtirok etgan. Manbada qayd etilishicha, xAI yil boshida Maskning kosmik kompaniyasi - SpaceX bilan birlashgan.
Muzokaralar yakunida sunʼiy intellekt rivoji ustidan nazoratni kuchaytirish boʻyicha qoʻshma kelishuv imzolangan. Tramp hujjatni oʻzining Truth Social ijtimoiy tarmogʻida eʼlon qilgan.
Kelishuvga muvofiq, har bir kompaniya oʻz sunʼiy intellekt modellarining imkoniyatlarini kuzatish va xavfsizlik standartlariga muvofiqligini tekshirish uchun «ishonchli ichki mexanizmlar» yaratishi kerak. Bunday nazorat modellarni oʻqitish va amaliyotga joriy etish bosqichlarini qamrab olishi nazarda tutilgan.
Asosiy eʼtibor kiberxavfsizlik, biologik va kimyoviy xavfsizlik bilan bogʻliq yoʻnalishlarga qaratiladi. Tekshiruvlar davomida aniqlangan xavf va muammolar bartaraf etilishi lozim.
Shuningdek, IT-kompaniyalardan mustaqil auditorlar bilan hamkorlik qilish hamda sunʼiy intellekt tizimlari xavfsizligini oshirishga xizmat qiluvchi standart va usullarni ishlab chiqish boʻyicha qoʻshma uchrashuvlarda muntazam qatnashish kutilmoqda.
Tramp kelishuv «maʼnaviy kuchga» ega ekanini, ammo uning bajarilishini sud tartibida majburan taʼminlash mumkin emasligini aytgan. Shu bilan birga, hujjatda vaqt oʻtishi bilan mazkur choralarni qonunlar yoki meyoriy hujjatlarda mustahkamlash zarurati paydo boʻlishi mumkinligi qayd etilgan.
Tramp sunʼiy intellekt rivojini qoʻllab-quvvatlamoqda
AQSH prezidenti 19-sentabr kuni sunʼiy intellekt masalalari bilan shugʻullanadigan maxsus tuzilma - «sunʼiy intellekt kuchlari» yaqin orada tashkil etilishini eʼlon qilgan edi.
Tramp ushbu texnologiya rivojiga toʻsqinlik qilish niyatida emasligini bildirib, uning joriy etilishini «navbatdagi sanoat inqilobi» deb atagan. Oq uy rahbari AQSH sunʼiy intellekt sohasida Xitoydan ustunligini saqlab qolishini xohlashini ham taʼkidlagan.
Kompaniyalar rahbarlari nimadan xavotirda?
Ayni paytda, sentabr oyi oʻrtalarida Claude, ChatGPT va Gemini tizimlarini ishlab chiqqan Anthropic, OpenAI va Google kompaniyalari rahbarlari sunʼiy intellekt rivojlanish surʼatlarini sekinlashtirishni taklif qilgan.
