Oʻzbekisonda endi qaysi hududda qanday quvvat zarurligi oldindan rejalashtirilib, tayyor loyihalar ochiq tanlovga chiqariladi. Bu haqda Shavkat Mirziyoyev yoqilgʻi-energetika tarmogʻidagi investorlar bilan ochiq muloqotda malum qildi.
Davlat rahbari oʻtgan yillarda energetika loyihalarini tayyorlash va investorlar bilan ishlash boʻyicha katta tajriba toʻplanganini qayd etdi. Endi hamkorlikning yangi bosqichiga oʻtiladi: har bir investitsiya yangi quvvat yaratish bilan birga taʼminot ishonchliligini oshirishi va yoʻqotishlarni kamaytirishi kerak.
2030-yilgacha 22 ming megavatt yangi quvvat yaratish maqsad qilingan. Natijada elektr energiyasi ishlab chiqarishning yillik hajmi 129 milliard kilovatt soatdan oshadi, qayta tiklanuvchi energiya ulushi 54 foizga yetadi.
Yaqinda imzolangan farmon bilan yoqilgʻi-energetika sohasida davlat va biznesning vazifalari aniq ajratilgani qayd etildi. Yangi bosqichda loyihalar ochiq raqobat, shaffof qoidalar va kelishilgan shartlarning izchil bajarilishi asosida amalga oshiriladi.
Ilk bosqichda «yashil» quvvatlarni tez yaratish uchun loyihalar koʻpincha investorlar taklif qilgan hududlarda joylashtirildi. Bu koʻplab sarmoya jalb etish imkonini berdi. Biroq ayrim joylarda quvvatlar toʻplanib, elektrni boshqa hududlarga yetkazish xarajatlari oshdi.
«Bizga alohida-alohida elektr stansiyalari emas, uzviy bogʻlangan energetika tizimi kerak», – dedi prezident.
Endi qaysi hududda qanday quvvat zarurligi oldindan rejalashtirilib, tayyor loyihalar ochiq tanlovga chiqariladi.
Tanlovga qoʻyiladigan har bir loyiha boʻyicha yer maydoni, tarmoqqa ulanish nuqtasi va muddati, elektrni xarid qilish hamda toʻlov shartlari avvaldan eʼlon qilinadi. Barcha investorlar uchun talablar teng boʻladi, toʻlov intizomi va xatarlarni kamaytirish mexanizmlari mustahkamlanadi.
Yaqinda umumiy quvvati 2 ming 200 megavatt boʻlgan 6 ta quyosh va shamol stansiyasining loyihasi ochiq tanlovga chiqariladi. Davlat rahbari investorlarni ularda ishtirok etishga taklif qildi.
Birinchi marta energetika sohasining 2050-yilgacha boʻlgan Milliy bosh rejasi ishlab chiqilib, ochiq eʼlon qilinadi. Kelgusi yil 1-martgacha tarmoqlarga ulanish imkoniyatlari xaritasi, 1-iyulga qadar toʻliq bosh reja taqdim etiladi.
