Chegirma olish uchun kontrakt.edu.uz platformasi orqali ariza yuborish kerak. Ariza ikki ish kunida koʻrib chiqiladi. Talabaning pedagog farzandi ekani tasdiqlangach, chegirma avtomatik qoʻllanadi.
Imtiyoz faqat davlat oliy taʼlim tashkilotlarining kunduzgi taʼlim shaklida oʻqiyotgan talabalarga beriladi. Pedagogning bir nechta farzandi ushbu talablarga mos kelsa, ularning barchasi chegirmadan alohida foydalanishi mumkin.
Toʻliq boʻlmagan grant asosida, yaʼni xarajatlarning 50 foizi davlat granti, qolgan 50 foizi kontrakt hisobidan qoplanadigan tartibda oʻqiyotgan talabalarga ham imtiyoz tatbiq etiladi. Bunda 30 foizlik chegirma faqat kontrakt qismiga hisoblanadi.
Pedagogning davlat yoki xususiy taʼlim tashkilotida ishlashi imtiyozga toʻsqinlik qilmaydi. Xususiy oliygoh, maktab va bogʻchalardagi pedagoglarning farzandlari ham belgilangan shartlar asosida chegirma olishi mumkin. Bogʻcha tarbiyachilari ham imtiyoz qamroviga kiradi.
Taqdim etilgan tushuntirishga koʻra, pedagoglar doirasi Adliya vazirligida 2026-yil 9-iyunda 3849-raqam bilan roʻyxatdan oʻtkazilgan pedagogik faoliyatga oid lavozimlar roʻyxati asosida belgilanadi. Unda 465 ta lavozim keltirilgan. Tyutorlar va oʻquv markazlari oʻqituvchilari mazkur imtiyoz qamroviga kirmaydi.
Chegirma quyidagilarga tatbiq etilmaydi:
oliy harbiy va harbiylashtirilgan taʼlim tashkilotlarida oʻqiyotganlarga;
nodavlat oliygohlar, Oʻzbekistondagi xorijiy oliygohlar va ularning filiallari talabalariga;
kechki, masofaviy va sirtqi taʼlim shakllariga;
qoʻshimcha va tabaqalashtirilgan toʻlov-kontraktga;
xorijiy hamkor oliygohlar bilan qoʻshma taʼlim dasturlari va fakultetlarida oʻqiyotganlarga.
Imtiyoz har bir oʻquv yili uchun bir marta qoʻllanadi, keyingi yillarda ham undan qayta foydalanish mumkin. Agar ota yoki ona pedagog toifasidan chiqarilsa, keyingi oʻquv yilidan chegirma berish toʻxtatiladi.
