Samarqandda AQSH davlat kotibi Marko Rubio ishtirokida oʻtgan C5+1 uchrashuvlarida ham kritik minerallar taʼminotini diversifikatsiya qilish, investitsiyaviy va texnologik hamkorlikni kengaytirish masalalari muhim oʻrin tutdi.
Oʻzbekiston uchun bu muloqotlar mineral resurslarni chuqur qayta ishlash va mamlakatimizning xalqaro sanoat zanjirlaridagi ishtirokini kengaytirishda muhim ahamiyatga ega. Mamlakatimiz volfram, molibden, litiy, grafit, germaniy kabi muhim mineral resurslarga hamda ushbu yoʻnalishda 100 dan ortiq loyihani qamrab olgan portfelga ega.
Oʻzbekiston prezidenti Shavkat Mirziyoyev rahbarligida amalga oshirilayotgan islohotlar ushbu salohiyatni yuqori qoʻshilgan qiymatli mahsulotlar ishlab chiqarishga yoʻnaltirishga qaratilgan. Xorijiy investitsiyalar va zamonaviy texnologiyalarni jalb etish, mahalliy qayta ishlash quvvatlarini kengaytirish bu boradagi ustuvor vazifalardandir.
Oʻzbekiston texnologik metallar kombinati (TMK) mazkur yoʻnalishlarda xalqaro kompaniyalar va moliya institutlari bilan amaliy muzokaralar olib bormoqda. Xususan, AQShning DFC korporatsiyasi bilan 4 milliard 200 million dollarlik investitsiya loyihalarini moliyalashtirish imkoniyatlari koʻrib chiqilmoqda.
Metallica Commodities kompaniyasi bilan umumiy qiymati 1 milliard 27 million dollar boʻlgan 5 ta loyihani birgalikda amalga oshirish istiqbollari muhokama qilinmoqda. Vast Resources bilan esa 29 million 400 ming dollarlik 6 ta loyiha boʻyicha hamkorlik imkoniyatlari oʻrganilmoqda.
Samarqanddagi C5+1 uchrashuvlari doirasida TMK 25 dan ortiq xorijiy kompaniya va tashkilot bilan hamkorlik masalalarini kun tartibiga kiritdi.
Ushbu uchrashuvlarda muhokama qilingan yoʻnalishlardan biri sanoat chiqindilaridan qimmatli mineral va metallarni ajratib olish boʻldi. Bu yondashuv chiqindilar tarkibidagi foydali komponentlarni qaytadan iqtisodiy aylanmaga kiritishni nazarda tutadi.
