Аҳоли гавжум жойларда ОИВ инфекциясига текшириш тадбирлари ўтказилмоқда 

Аҳоли ўртасида ОИВ инфекциясининг тарқалишини олдини олиш, аҳоли саломатлигини муҳофаза қилиш, ушбу касаллик бўйича тиббий маданият ва тушунчани ошириш мақсадида ОИТСга қарши курашиш маркази мутахассислари давлат ва нодавлат ташкилотлари билан ҳамкорликда кенг қамровли профилактик тарғибот тадбирларини олиб бормоқда.

ОИВ инфекцияси тушунчасини чуқурроқ сингдириш мақсадида аҳоли, айниқса ёшлар ўртасида маърузалар, давра суҳбатлари, якка тартибдаги аноним дўстона суҳбатлар, шунингдек, аҳоли гавжум жойларда ОИВ инфекциясига текшириш учун бепул акция тадбирлари ўтказилмоқда.

ОИВ инфекциясининг парентерал йўл билан юқиши ва ОИВ инфекцияли онадан болага юқишини олдини олиш мақсадида ишлаб чиқилган чора-тадбирларда белгиланган вазифалар ижроси доирасида тиббиёт ходимлари ўртасида ўқитиш ишлари олиб борилмоқда ҳамда соҳага оид амалий-услубий ёрдам кўрсатилмоқда.

ОИВ инфекцияси аниқланган фуқаро ўз статусини била туриб бошқа фуқарони юқиш хавфи остида қолдириши ёки унга ОИВ/ОИТС касаллигини юқтиргани аниқланган ҳолатда 5 йилдан 8 йилгача озодликдан маҳрум қилиниши билан қонуний жавобгарликка тортилиши ҳақида Жиноят кодексининг 113-моддасида белгиланган. Ушбу қонун талабларига мувофиқ, ОИТСга қарши курашиш марказларининг мутахассислари беморларни расман огоҳлантирди.

«Фуқаро соғлиғини сақлаш тўғрисида»ги қонуннинг 45-моддасига кўра: «Фуқаронинг тиббий ёрдам сўраб мурожаат қилганлиги, соғлиғининг ҳолати, касаллигига қўйилган ташхис ҳамда уни текшириш ва даволаш давомида олинган бошқа маълумотлар шифокор сирини ташкил этади. Шифокор сири ҳисобланган маълумотлардан ўқиш ҳамда касб-корга, хизматга доир ва бошқа хил вазифаларни бажариш пайтида хабардор бўлиб қолган шахсларнинг бу маълумотларни фуқаро ёки унинг қонуний вакилининг розилигисиз ошкор қилишига йўл қўйилмайди».

Санитария-эпидемиологик осойишталик ва жамоат саломатлиги қўмитаси ҳамда Республика ОИТСга қарши курашиш маркази ижтимоий тармоқларда  ОИВ инфекциясига оид асоссиз ва норасмий маълумотларни тарқатмасликни сўради.