Рио-2016 кундалиги. Биринчи кун баҳсларидан кейин Ўзбекистон медал олган 20 давлат ичида

Рио-де-Жанейро олимпиадасида иккинчи кун баҳслари давом этмоқда. 6 август куни ўзбекистонликлар терма жамоаси 5та спорт туриб бўйича баҳсларни бошлади.

Академик эшкак эшиш. Эркаклар, яккалик, 2000 метр.
Шаҳбоз Холмирзаев саралаш босқичида иштирок этди ва ўз гуруҳида 5 спортчи орасида финишга тўртинчи бўлиб етиб келди. Ўз гуруҳларида дастлабки 3та ўринни эгаллаган спортчилар чорак финалга тўғридан-тўғри йўл олди. Холмирзаев 7 август куни қўшимча босқичда иштирок этади. Бу босқичда гуруҳларда дастлабки иккита ўринни эгаллаган спортчилар чорак финал йўлланмасини қўлга киритади. 

Сузиш. Ўзбекистонлик спортчилар кейинги босқичга чиқа олишмади
Сузиш бўйича 400 метрга комплекс услубда сузиш бўйича Раънохон Омонова саралаш босқичида иштирок этди. У иккинчи гуруҳда сўнгги ўринни қайд этди ва финалга чиқа олмади. Омонова энди 200 метрга комплекс услубда сузиш мусобақасида иштирок этади. 

Брасс услубида 100 метрга сузишда Владислав Мустафин саралашнинг 3-гуруҳида 1-йўлакчадан сузишни амалга оширди. У 1:01.66 натижа билан ўз гуруҳида 6-ўринни эгаллади. Бу натижа Мустафинга ярим финалга чиқиш учун етарли бўлмади. Владислав Рио-2016 олимпиадасидаги иштирокини якунлади.

Стол тенниси. Зоҳид Кенжаев кейинги босқичда
Ўзбекистон олимпия тарихида стол тенниси бўйича илк марта эркак спортчи иштирок этмоқда. Зоҳид Кенжаев Рио-2016 олимпиадасининг дастлабки саралаш босқичида чехиялик спортчига қарши баҳс олиб борди ва ғалаба қозонди. У Любомир Янкарик устидан 4:2 (8:11, 11:2, 13:11, 11:6, 8:11, 11:9) ҳисобида зафар қучди. Зоҳид Кенжаев навбатдаги босқичда Буюк Британия вакили Лиам Ритчфордга қарши баҳс олиб боради. 

Бокс. Хуршид Тожибоев нимчорак финалга йўл олди
Бокс бўйича 60 кг.гача бўлган вазнда иштирок этаётган Хуршид Тожибоев саралаш босқичида қатарлик Ҳакан Эрескерни мағлуб этди. У уч раунд давомида катта устунликка эга бўлиб, рақибига ҳеч қандай имконият қолдирмади. Ҳар учала ҳакам устунликни Тожибоевга берди — 30:25, 30:27, 30:27. Нимчорак финалда Хуршид Тожибоев буюк британиялик Йозеф Кординага қарши рингга кўтарилади.

Дзюдо. Диёрбек Ўрозбоев — бронза медаль совриндори
Пекин-2008 ва Лондон-2012 олимпия ўйинларининг дастлабки кунида дзюдочи Ришод Собиров (60 кг.) Ўзбекистон делегациясига илк медални келтирганди. Бразилияда эса шу вазнда иштирок этган Диёрбек Ўрозбоев ушбу анъанани давом эттирди ва терма жамоа ҳисобига илк бронза медални тақдим этди. 

Ўрозбоев 1/16 финал босқичида австралиялик Жошуа Катц, нимчорак финалда швейцариялик Людовик Чаммартинни мағлуб этди. 

У чорак финалда қозоғистонлик Элдос Сметовга имкониятни бой берди. Жангнинг асосий вақтида ҳисоб очилмади. Олтин очко учун кечган қўшимча бўлимда Сметов "юко" ишлашга муваффақ бўлди.

У бронза медали учун ўтиш жангида бразилиялик Фелипе Китадайга қарши татамига чиқди. Беллашув тугашига 35 сония қолганида Ўрозбоев ажойиб услуб қўллади ва "иппон" баҳоси билан ғалаба қозонди. 

Ўрозбоев бронза медали учун кечган баҳсда грузиялик Амиран Папинашвилини мағлубиятга учратди. Беллашув дебютида Диёрбек "юко" баҳосини қўлга киритди ва устунликни баҳс сўнггига қадар сақлаб қолишга муваффақ бўлди. 

Шу тариқа, Ўзбекистон ҳисобига Рио-2016да бронза медали ёзиб қўйилди. 

Ўзбекистон терма жамоаси Канада, Испания ва Польша билан биргаликда 17-20 ўринларни бўлишиб турибди.

Ҳозирча 20та терма жамоа медал олди. Медаллар ҳисоби бўйича норасмий жадвални Австралия терма жамоаси бошқармоқда (2та олтин ва битта бронза). Иккинчи ўринда Венгрия жойлашган (2та олтин медал). Учинчи ўринда америкалик спортчилар 1 олтин ва 4 кумуш медал билан боришмоқда.

Манба: std.uz