Трансфер шартлари

29 ёшли ҳужумчи каталонияликлар билан 2029 йилнинг 30 июнигача мўлжалланган шартнома имзолади. Трансфер суммаси расман ошкор этилмаяпти, бироқ ОАВ маълумотларига кўра, «Барселона» «Арсенал»га тахминан 10 млн евро тўлайди. Бундан ташқари, 4 млн еврогача бонуслар кўзда тутилган, шунингдек, Лондон клубига футболчининг келажакдаги сотувидан тушган маблағнинг 20 фоизини олиш ҳуқуқи тақдим этилган.

«Барса» нега айнан Жезусни танлади?

Каталонияликлар Роберт Левандовски кетганидан буён классик марказий ҳужумчи излаётган эди. Дастлаб «Атлетико Мадрид» аъзоси Хулиан Алварес асосий нишон сифатида кўрилаётганди, бироқ Мадрид клуби аргентиналик футболчининг сотуви бўйича музокара олиб боришдан бош тортди. Натижада «Барселона» эътиборини Жезусга қаратди, у «Арсенал»да Кай Ҳаверц ва Виктор Дёкерешга рақобатни бой бериб, асосий таркибдаги ўрнини йўқотганди.

Мураббийнинг муносабати

«Барселона» бош мураббийи Ҳанси Флик «Райо Вальекано» устидан қозонилган ғалабадан сўнг ушбу келишувга изоҳ берди:

«Тўғриси, уни қўлга киритиш имконияти пайдо бўлганидан бироз ҳайрон бўлдим. Унинг ўйин услуби менга жуда ёқади — бу бизнинг услубимизга мос тушади. Ўйлайманки, у ўйинларда бизга катта ёрдам бера олади. У биз учун муҳим ўйинчига айланиши мумкин, шунинг учун [спорт директори] Декога раҳмат — у яна бир бор ажойиб ишга қўл урди».

Футболчининг фаолияти

Габриэл Жезус 1997 йил 3 апрелда Бразилиянинг Сан-Паулу шаҳрида туғилган. Фаолиятини «Палмейрас» клубида бошлаб, мамлакат кубоги ва чемпионатини ютган, шундан сўнг 2016 йили Хосеп Гвардиола бошчилигидаги «Манчестер Сити»га ўтган. У «Сити» сафида 236 та ўйин ўтказиб, 95 та гол урган ва 45 та голли узатмани амалга оширган. Шунингдек, тўрт марта Англия чемпионлиги, Англия Кубоги ва бошқа совринларни қўлга киритган.

2022 йил июл ойида ҳужумчи «Арсенал»га ўтди ва бу жамоада 123 та учрашувда майдонга тушиб, 32 та гол урди. 2025 йил январ ойида у тиззасининг хочсимон боғламидан оғир жароҳат олди ва фақат декабрга келиб майдонга қайтди ҳамда «тўпчилар»га 2025/26-йилги мавсум чемпионлигини қўлга киритишда ёрдам беришга улгурди.

Жезус «Барселона» ҳужум чизиғини ёзнинг бошқа янги футболчилари — Энтони Гордон ва Карим Адейеми билан биргаликда тўлдиради.