Қирғизистондаги референдумда қатнашганларнинг 79,59 фоизи Конституцияга ўзгартиришни ёқлаб овоз берди

Қирғизистонда 11 декабрь куни бўлиб ўтган референдумда иштирок этганларнинг деярли 80 фоизи Конституцияга ўзгаришлар киритишни маъқуллаб овоз берган. Бу ҳақда Қирғизистон Марказий Сайлов комиссияси маълумотига асосланиб, ТАСС хабар қилди.

"Айни вақтда барча сайлов участкаларида бюллетенлар ҳисоблаб бўлинди", деган манба.

Дастлабки маълумотларга кўра, умумхалқ референдумида сайлаш ҳуқуқига эга бўлган қирғизистонликларнинг (2,85 млн) 42,07 фоизи овоз берган.

"Референдумда иштирок этганларнинг 79,59 фоизи таклифни ёқлади, 15,4 фоиз киши қарши чиқди", дейилган МСК хабарида.

Референдумнинг якуний натижалари бир неча кундан кейин эълон қилинади.

Таклиф этилаётган ўзгартишларга кўра, президентнинг ваколатлари камайтирилади, парламент ва бош вазирнинг ваколатлари эса, аксинча, кенгайтирилади. Шунингдек, суд ва ҳуқуқ-тартибот тизимлари ислоҳ этилади.

Ўзгаришлар 2017 йил декабридан бошлаб кучга кириши кўзда тутилган.