Қатар можароси: яна бир давлат Доҳа билан дипломатик алоқаларни узди

Фото: РИА "Новости"

Ҳинд океанидаги орол давлат – Комор араб мамлакатлари кетидан Қатар билан дипломатик алоқаларни узгани ҳақида маълум қилди. Бу ҳақда Саудиянинг SPA янгиликлар агентлиги хабар берган.

Агентлик маълумотига кўра, Комор ҳукумати дипломатик алоқалар узилгани ҳақидаги тегишли билдиришномани Қатарнинг Моронидаги элчихонасига юборган, бу қарор бугундан бошлаб кучга киради.

Душанба куни Миср, Саудия Арабистони, Баҳрайн ва БАА Қатар билан дипломатик алоқаларни узди ҳамда Доҳани террорчилик ташкилотларини қўллаб-қувватлаш ва Яқин Шарқдаги вазиятни беқарорлаштиришда айблашди. Кейинчалик уларнинг сафига Яман, Ливия муваққат ҳукумати, Мальдив ва Маврикий ҳам қўшилди. Иордания Доҳадаги ўз дипломатик ваколатхонаси даражаси пасайтирилганини маълум қилди. Қатар ТИВ раҳбарининг маълум қилишича, Доҳа жавоб чораларини қабул қилмайди.

Тайёрлаган: Отабек Матназаров

#Қатар #Комор

Форс кўрфазида жиддий сиёсий инқироз юзага келди. Саудия Арабистони, Миср, Баҳрайн, БАА, Яман, Ливия ва Мальдив бошқа бир араб давлати Қатар билан дипломатик алоқаларни узди. Бунга Қатар Эронни ва терроризмни қўллагани сабаб сифатида кўрсатилмоқда.