Италияда кема причалга урилиши оқибатида 55 киши жабрланди

Италиянинг Искья оролидаги портда кеманинг причалга келиб урилиши оқибатида 55 киши жабрланди. Бу ҳақда ANSA ахборот агентлиги хабар бермоқда. 

Маълум қилинишича, Medmar хусусий компанияси кемаси йўловчилари тўқнашув оқибатида лат ейиш, мўматалоқ каби кичик жароҳатлар олганлар. Барча жароҳатланганлар шифохонага етказилганлар.

Кеманинг причалга урилиши вақтида йўловчилар чиқишга тайёргарлик кўраётган бўлишган ва зарбадан оёқларида туролмай, йиқилиб тушишган. Йўловчилардан бирининг айтишича, кема портга яқинлашиш вақтида тезлигини пасайтирмаган.

"Кема пирсга урилиши аён эди", деб айтди аёл. Унинг айтишича, кемада тўқнашув вақтида саросима кўтарилган. 

Айни вақтда кемада тегишли текширув ўтказилмоқда.