«Дунё» ахборот агентлиги маълумотига кўра, ташриф доирасида меҳнат миграцияси, саноат, қишлоқ хўжалиги ва савдо соҳаларида ҳамкорликни кенгайтириш масалалари муҳокама қилинган.
Дастлабки 40 нафар ўзбекистонлик иш бошлади
Ўзбекистондан қишлоқ хўжалиги мутахассисларини Италияда мавсумий ишга жалб қилиш лойиҳаси расман йўлга қўйилган. Биринчи босқичда 40 нафар ўзбекистонлик Salvi компаниясида меҳнат фаолиятини бошлаган.
Лойиҳа иштирокчилари ишга боришдан олдин икки ой давомида итальян тилини ўрганиб, тегишли тренинглардан ўтган. Улар мева-сабзавотларни қайта ишлаш ишларига жалб қилинган.
Наманган вилояти делегацияси вакиллари ҳамюртлар билан суҳбатлашиб, уларнинг яшаш ва иш шароитларини кўздан кечирган.
Salvi раҳбарияти билан музокараларда келгуси йилларда қўшимча минг нафар фуқарони ишга жалб қилиш бўйича келишувга эришилган.
Италия компаниялари билан инвестиция ва экспорт шартномалари имзоланди
Ташриф давомида Наманган вилояти ҳокими Шавкатжон Абдураззоқов бошчилигидаги делегация Эмилия-Романя вилояти президенти Микеле де Паскале билан учрашган.
Ўзбекистоннинг Италиядаги элчихонаси ташкил этган мулоқотда саноат, тўқимачилик ва юқори қўшилган қийматли маҳсулотлар ишлаб чиқариш соҳаларидаги ҳамкорлик муҳокама қилинган.
Томонлар ҳудудлараро алоқаларни йўлга қўйиш, ўзаро делегациялар ташрифларини ташкил этиш ва Наманган вилоятига инвестициялар жалб қилиш бўйича келишиб олган.
Болонья ва Рим шаҳарларида «Наманган ва Италия» ҳамда «Наманган ва Эмилия-Романя» бизнес-форумлари ўтказилган. Тадбирларда 100 дан ортиқ етакчи компания вакиллари қатнашиб, корхоналар ўртасида учрашувлар ташкил этилган.
Музокараларда қишлоқ хўжалиги, машинасозлик, тўқимачилик ва логистика соҳаларидаги лойиҳалар кўриб чиқилган. Наманган корхоналарининг Италия бозорига чиқиши, экспорт географиясини кенгайтириш ва қўшма ишлаб чиқаришни ташкил этиш бўйича келишувларга эришилган.
Хусусан, Vinarjia Marko, SMI Group, Gamma Meccanica ва Bonifiche Ferraresi компаниялари билан озиқ-овқатни қайта ишлаш, саноат маҳсулотлари ишлаб чиқариш ва интенсив боғдорчилик йўналишларида инвестиция ҳамда экспорт шартномалари имзоланган. Уларнинг аниқ қиймати хабарда келтирилмаган.
