3 доллар эвазига Трамп билан кечки тамадди қилиш имконияти пайдо бўлди

2020 йилдаги сайловларда иштирок этиш истагини билдирган АҚШ президенти Дональд Трампнинг сайлов штаби у билан Даллас шаҳрида кечки тамадди қилиш ҳуқуқини ютиб олишни таклиф қилмоқда.

Штаб Трампнинг тарафдорларига йўллаган мактубида ушбу ҳуқуқни қўлга киритиш ўйналишида иштирок этмоқчи бўлганлар 20 октябрь якунланишигача жамғармага камида 3 доллар хайрия қилишлари кераклиги айтилган. Маблағларни АҚШ Республикачилар партиясининг миллий қўмитаси махсус сайтида киритиш мумкин. 

Ушбу тадбир ташкилотчилари ғолибга Далласгача парвоз ва меҳмонхонада туриш харажатлари қоплаб берилишини ваъда қилишмоқда. Шунингдек, ғолиб "ҳаётида бир марта бўладиган бу ҳодисага" ўзи билан яна бир кишини олволиши мумкин.

Трамп АҚШ тарихидаги энг номашҳур президентлардан бири бўлиб қолмоқда. Real Clear Politics компаниясининг ўртачалаштирилган маълумотларига кўра, Трампнинг президент сифатидаги ишини 39,4 фоиз америкаликлар қўллаб-қувватламоқда, 55,5 фоиз америкаликлар эса маъқулламаяпти.