«Трибуна» Испания чемпионатининг 13-тури якунларини ҳисоб қилади.
Ҳакамдан бошқа ҳамма кўрган гол
«Валенсия» ва «Барселона» учрашуви Испания чемпионати 13-турининг ташриф қоғозига айланиши кутилганди. Аммо бу ўйин ҳакамлик можаролари билан кўпроқ ёдда қоладиган бўлди. Ўйиннинг биринчи бўлимида Месси берган зарбани мезбонлар жамоаси дарвозабони Нету тўпни қўлидан чиқариб юборди ва тўп дарвоза чизиғини кесиб ўтди. Буни ҳамма, икки жамоа футболчилари, трибуналардаги мухлислар ва телетомошабинлар кўришди, аммо ўйин ҳаками Вильянуэва ва унинг ёрдамчисидан бошқа. Бу эпизод ўйин натижасига таъсир кўрсатгани бошқа масала, энди ҳамма Испания чемпионати видеотакрорларни қўллаши кераклиги ҳақида гапирмоқда.
Вальверденинг муносиб жавоби
«Барселона» бош мураббийи Эрнесто Вальверде ушбу ўйиндан кейин берган интервьюси орқали кўпчиликнинг олқишларига сазовор бўлди (фақат каталонияликлар жамоаси мухлисларидан бошқа). Ундан журналистлар Мессининг голи ҳисобга олинмаганига муносабатини сўрашганида, у шундай деди: «Биз «Малага»га қарши ўйнаганимизда, бизнинг биринчи голимиз майдон ташқарисига чиқиб кетган тўп ўйинга қайтиши ортидан рўй берганди. Ўшанда ҳакам ноҳақ голни ҳисобга олган. Шундай экан, барча ҳам ҳакамлар хатоларидан жабр кўради».
Родриго жазоланмасдан қолди
Ушбу марказий баҳс ҳаками Вильянуэванинг яна бир ҳаракати муҳокама қилинди. Ўйиннинг 60-дақиқасида майдонга чиққан Гайя шу заҳоти қанот бўйлаб югурди ва тўпни жарима майдонига узатди. Тер Штеген тўпга ета олмади ва унинг ортида турган Родриго осонлик билан дарвозани ишғол этди. Испаниялик футболчи голни нишонлаш учун майдон четига югурди ва бошига апелсинранг парик тақди. Бундай ҳаракат учун ҳакам албатта сариқ карточка кўрсатиши керак эди, Вильянуэва воқеа жойига карточкасини қўлида кўтариб келди, лекин уни баланд кўтармади ҳамда Родриго жазоланмасдан қолди. Родриго барибир ўйинда сариқ карточка олди, 74-дақиқада у Бускетсга қарши қўполлик учун огоҳлантирилди. Агар у голни нишонлаш вақтидаги ҳаракатлари учун ҳам огоҳлантирилганида, фолдан кейин қизил олиши мумкин бўларди.
Кейин маълум бўлишича, ҳакам футболчининг бундай ҳаракати сабабини тўғри тушунгани учун қароридан қайтганди. Родриго бу орқали урган голини бир неча кун олдин вафот этган «Валенсия»нинг собиқ президенти Жайме Ортига бағишлаган.
