«Ливерпул» бу мавсумда «Энфилд»да кўп очко йўқотмоқда (2 мағлубият, 2 дуранг ва атиги бир ғалаба), шу билан бирга сафар ўйинларида лиганинг энг кам очко йўқотган жамоаси бўлмоқда (фақат 1-турда «Нюкасл» майдонида дуранг ўйнаган, қолган барча учрашувларда ғалаба). 10-турда Лондонга сафар қилган мерсисайдликлар дастлабки беш сафар ўйинида 13 очко жамғарган ҳолда клуб рекордини такрорлади. Қолаверса, Андони Ираола жамоаси учун бу ғалаба «Челси»ни қувиб ўтиб, тўртинчи ўринга кўтарилишни таъминлади.
Якшанба кунги ўйинни амалда биринчи бўлим охирида Мак Аллистер урган гол ҳал қилди, аргентиналик яримҳимоячи Собослаи жарима зарбасидан оширган тўпга барчадан олдинроқ улгурди. Иккинчи бўлим бошида эса меҳмонлар ўнг қанотдан уюштирган ҳужум Барколянинг Вирцга голли узатма бериши билан якунланди. Ўйиннинг сўнгги дақиқаларида Флориан тўпни қизғанмади ва янада қулайроқ позицияда турган Исакка ассистентлик қилди.
«Пэлас» қўшимча дақиқаларда пеналтидан битта жавоб голини урди, аммо бу жамоа бош мураббийи Пиер Сажни истеъфодан қутқара олмади. Лондонликлар 10 турда атиги 7 очко жамғарган ҳолда турнир жадвалининг 20-поғонасида қолмоқда.
18 йил-у 7 кун олдин Ҳендерсон «Сандерленд» сафида «Челси»га қарши ўйинда профессионал фаолиятини бошлаганди. Якшанба кунги ўйинда эса у энди лондонликлар жамоаси сафида «қора мушуклар»га қарши сафар ўйинига келди ва юбилейини нишонлади. Бу унинг клублар миқёсидаги 700-ўйини эди. Аммо бу оқшомда Ҳаби Алонсо жамоаси учун бундан бошқа ижобий воқеа бўлмади.
Биринчи бўлимда пеналтидан гол ўтказиб юборган меҳмонлар ўйин охиригача чемпионатнинг охирги ўрнида турган жамоага қарши ҳеч нарса қила олишмади. Алонсо иккинчи бўлимда алмаштиришлар қилди, Кайседони марказий ҳимояда ўйнатди, аммо «Челси» бу оқшом очко олишга лойиқ ўйин кўрсатмади. Иккинчи бўлимдаги энг яхши вазият ҳам «Сандерленд»да бўлди. 77-дақиқада Изидор дарвозабон билан яккама-якка вазиятга чиқиб борди, аммо Пендерс ўз вақтида жойини тарк этди ва хавфли вазиятни бартараф этди.
Бу ғалаба эвазига «Сандерленд» онлайн жадвалда «Кристал Пэлас» ва «Манчестер Юнайтед»ни қувиб ўтиб, 18-ўринга кўтарилди. «Челси» эса «Ливерпул»ни олдинга ўтказиб юборди ва фақат қўшимча кўрсаткичлар ҳисобига «Эвертон»ни ортда қолдириб, бешинчи ўринда жойлашган.
«Брайтон» бу сафар ҳам олис масофадан урилган гол билан ҳисобни очди, Гомеснинг зарбасида кутилган гол кўрсаткичи атиги 0,04 xg’га тенг эди. Кейин эса «Брентфорд» ҳужумчиси Игор Тиаго мезбонларнинг вазифасини осонлаштирди. 23-дақиқада у «чайкалар» футболчиси Чема Андреснинг қўполлигини ўзи жазолашга қарор қилди ва унинг юзига уриб юборди. Ҳакам аввалига унга сариқ карточка кўрсатганди, видеотакрордан кейин карточканинг рангги ўзгарди. Бўлим охирида Грос пеналтини аниқ ижро этиб, ўйин тақдирини ҳал қилди.
Навбатдаги қуруқ ғалабадан кейин (10 ўйиндан 7 тасида дарвоза дахлсизлиги сақлаб қолинган) «Брайтон» турнир жадвалида «Манчестер Сити»ни қувиб ўтди ва иккинчи ўринга кўтарилди. Пешқадам «Арсенал» билан фарқ 5 очкони ташкил этмоқда.
Ўтган ҳафта ўртасида «МЮ» ЕЧЛда «Рома» (3:2) билан ўйинда камбэк уюштириб, «Олд Траффорд»да йиғилган мухлислар учун байрам уюштириб берганди. Аммо табиийки, «қизил иблислар» «Астон Вилла»га қарши ўйинга ҳам ушбу сценарийни такрорлаш учун майдонга чиқмаганди. Аммо ўйиннинг дастлабки дақиқаларидаёқ таблодаги ҳисоб 0:2 кўринишини олди – ўйин стартидан 3 дақиқаю 40 сония ўтганида икки гол ўтказиб юборилиши АПЛ тарихидаги антирекордга айланди.
Бирмингҳэмликлар Унаи Эмерини АПЛдаги 200-ўйини билан табриклаш учун майдонга тушишганди ва бу борада Алиссон барчадан кўра жонбозлик кўрсатди. Бразилиялик вингер аввалига ҳисобни очди, кўп ўтмай унинг зарбасидан кейин Ламменс тўпни қўлидан чиқариб юборди ва Жексон барчадан илдамроқ ҳаракат қилиб, ҳисобдаги фарқни оширд.
Аммо 16-дақиқада Камара жарима майдони ичида Матеус Куняни йиқитди ва Бруну Фернандеш белгиланган пеналтини аниқ ижро этди. Бўлим охирида Мазравий Тилемансни голли вазиятга чиқарди ва ёзда «Астон Вилла»дан келган белгиялик яримҳимоячи янги жамоасидаги илк голини собиқ жамоаси дарвозасига киритди – 2:2.
Аммо иккинчи бўлимда «МЮ» барчасини яна қайтадан бошлашига тўғри келди. Аввалига Диогу Далот Алиссон билан дуэлни бой берди. Португалиялик ҳимоячи жарима майдони ичида фол ишлатди ва Макгинн пеналтини аниқ ижро этиб, яна меҳмонларни ҳисобда олдинга олиб чиқди. Кейин эса стандарт вазитяда мезбонларнинг бошқа бир ҳимоячиси Йоро қўпол хатога йўл қўйди, у ўз дарвозасини ишғол этиб қўйиши мумкин эди, Ламменс тўпни тўсинга йўналтириб юборди, аммо қайтган тўпга Горецка биринчи бўлиб етиб келди ва Англиядаги илк голини нишонлади.
Ҳисоб 2:4 кўринишини олгач, барча Майкл Кэррик шу турдаёқ истеъфога чиқарилишини тахмин қила бошлади, аммо «Юнайтед» футболчилари ўйиннинг сўнгги 15 дақиқалигида штурм уюштиришди. Мураббий ҳам тўғри алмаштиришларни амалга оширди. Маунтнинг зарбаси дарвоза тўсинига тегиши меҳмонлар учун огоҳлик қўнғироғи эди. Ўйинга қўшиб берилган дақиқалар бошланганида Зиркзе Доргунинг қанотдан узатмасини голга айлантирди, ҳакам томонидан қўшиб берилган олтинчи дақиқада эса ҳисоб тенглашди – бурчак зарбасига Ламменс ҳам етиб келди ва ҳамкасби Судзуки тўпга чиқишига тўсқинлик қилди, Доргу эса бундан фойдаланиб, дарвозани ишғол қилди.
«Қизил иблислар» халқаро танаффусга 18-поғонада йўл олаётган бўлса-да, сўнгги икки ўйиндаги қаҳрамонликлар Кэррикнинг фойдасига ишлади.
Испания чемпионатининг 12-тури доирасида «Барселона» ва «Атлетико» ўртасидаги баҳс пешқадамлик учун баҳсга айланди. Ўйин стартидан олдин Ла Лигада пешқадам «Реал» бўлиб турганди, аммо бу ўйин қандай натижа билан якунланишидан қатъи назар Жозе Моуринио жамоаси иккинчи ўринга тушишига тўғри келарди. Биринчи ўринга қайтиш учун «Барса»ни дуранг натижа ҳам қаноатлантирар, «Атлетико»га фақат ғалаба керак эди.
Мадридликлар Ла Лиганинг сўнгги етти турини очко йўқотишсиз ўтказганди. «Барса» эса класикодаги муваффақиятсизликдан кейин «Алавес»ни йирик ҳисобда мағлуб этганди. Аммо Ҳанс-Дитер Фликда таркиб билан боғлиқ муаммолар пайдо бўлган. Масалан, «Атлетико» билан ўйинда у Родри, Ҳави Эспарт, Дани Олмо ва Жюл Кунденинг хизматларидан фойдалана олмасди. Мезбонларда эса биргина Кристиан Ромеро жароҳатда.
Родри майдонда эмаслиги ўйин стартида сезилди. «Атлетико» илк дақиқалардан ҳужумга ташланди. Ҳулиан Алварес тезкор гол муаллифига айланиши мумкин эди: олтинчи дақиқада уни Жоан Гарсия билан яккама-якка вазиятга чиқариб юборишганди, аммо аргентиналик ҳужумчи сусткашликка йўл қўйди ва вазиятни қўлдан чиқарди. Шу вазиятда ишланган бурчак зарбасида эса Пубил бошда йўллаган зарбадан кейин тўп дарвоза тўсинига тегди.
Бунга мезбонлар ҳам худди хавфли ҳужум билан жавоб қайтаришди. Бу ҳужумда Педрининг зарбасидан кейин тўп дарвоза устунига борди. Бироз ўтиб Алварес барибир голли ҳаракат амалга оширди. 10-дақиқада Ҳулиан «Барса» жарима майдонига ёриб кириб, тўпни дарвозабон майдончасида бўш қолган Жулиано Симеонега етказди ва ҳисоб очилди.
Биринчи бўлим ўрталарига қадар «Атлетико» рақибга қараганда кескинроқ ва ҳужумларда аниқроқ ҳаракат қилди. Симеоне жамоаси бир неча бор иккинчи голга яқин келди. Алварес яна бир қулай вазиятдан фойдалана олмади.
Бўлимнинг иккинчи қисмида эса «Барселона» аста-секин ташаббусни қўлга ола бошлади. Биринчи бўлим статистикасига кўра «Атлетико» учта голли вазият яратган, «Барса»да – атиги битта. Аммо шу вазият каталонияликлар танаффусга ҳисобни тенглаштирган ҳолда йўл олиши учун етарли бўлди. Ўтган турда Фермин Лопес «Алавес» дарвозасига 1 гол уриб, 2 голга узатма берганди. Энди эса ёш яримҳимоячи Мадриддаги ўйинда ҳам ҳисобни тенглаштирди.
Танаффусдан кейин «Барселона» тўпга эгалик қилишда давом этди. Френки де Йонгнинг майдонга чиқиши ҳам вазиятни яхшилади. Алварес имкониятларни йўққа чиқаришда давом этди.
Ҳулиандан фарқли ўлароқ, Фермин рақибни аяб ўтирмади. 66-дақиқада испаниялик футболчи дублни расмийлаштирди. Шу паллагача ўйинда деярли сезилмаган Ламин Ямал жарима майдонига ажойиб узатма берди, Лопес эса Давид Ганцкодан илдамроқ ҳаракат қилиб, яқин масофадан тўпни бурчакка аниқ йўналтирди.
«Барселона» ўйин давомида кучини ажойиб тақсимлай олди. Ҳисоб 2:1 кўринишига келганида каталонияликларда ҳали кўпроқ куч қолганди. «Атлетико» эса биринчи бўлимни кучли ўтказди, аммо иккинчи бўлимда тез чарчади.
«Барса» турнир жадвалидаги пешқадамликни қайтарди ва халқаро танаффусга «Реал»дан уч, «Атлетико»дан беш очко кўп тўплаган ҳолда йўл олди.
