3 ноябр оқшомида ЕЧЛ умумий гуруҳ босқичи 4-тури доирасида 9 та учрашув бўлиб ўтди. «ПСЖ» қаторасига 4 ўйинда ҳам ғалаба қозониб, турнир жадвалини бошқармоқда, «Барселона» «Астон Вилла»га қарши қийин кечиши кутилган ўйинда йирик ғалабага эришди, «Бавария» қаторасига икки дурангдан кейин Мадридда ғалаба қозониб, кучли саккизликка кириб олди.
«Барселона» бу мавсумда нисбатан камтарона рақибларни осонлик билан тор-мор этиб келмоқда ва истаганича гол урмоқда. Шу билан бирга, топ рақибларга қарши ўйинларда қийналмоқда: каталонияликлар бир ҳафта ичида «ПСЖ» ва «Реал»га мағлуб бўлди. Унаи Эмери бошқарувидаги «Астон Вилла» ҳам рақобатбардош жамоа эди. Аммо «Барса» инглизларга қарши ўйинда қийинчиликка учрамади.
Ўйинда кўп нарса «Вилла» ҳимоясидаги қўпол хатодан кейин ҳал бўлди. Ўйиннинг еттинчи дақиқасидаёқ ҳимоядан чиқишда Гомес эҳтиётсизлик билан ён томонга пас берди ва тўпга эга чиққан Ямал олис бурчакни аниқ нишонга олди.
Бу билан у ЕЧЛда 20 ёшгача урилган голлар сони бўйича Мбаппени ортда қолдирди (13 га қарши 14). Умуман, 19 ёшли вингер бу мавсумни ўта юқори нотада ўтказмоқда: у «Барселона» ва миллий жамоа сафида 18 ўйинда гол+пас бўйича аллақачон 17+12 кўрсаткичини қайд этмоқда. Шундан ЕЧЛда тўрт ўйинда уч гол урди ва тўрт голга узатма берди.
«Астон Вилла» ҳимоячилари эса «Барселона»нинг юқори прессингидан сабоқ чиқаришмади. Меҳмонлар ҳимоядан чиқишда ердан ўйнашда давом этишди ва 26-дақиқада иккинчи гол ўтказилиши мумкин эди.
Бу сафар дарвозабон Судзуки рақибнинг уч футболчиси қуршовида қолиб кетди ва тўпни узоқлаштира олмади.
Мавзуга оид
Натижада Гордон қулай нуқтадан зарба бериш имконига эга бўлди, аммо дарвозабон ўз хатосини тўғрилади.
Бирмингҳэмликларда ҳам вазиятлар бўлди, шундай вазиятлардан бирида Манзамби Кубарсини алдаб ўтди, аммо Жоан Гарсия бехато ҳаракат қилди.
Иккинчи бўлим бошида Рафиня барибир ҳисобдаги фарқни иккитага етказди ва шундан кейин амалда ўйин тақдири ҳал бўлди. Кўп ўтмай бразилиялик футболчи навбатдаги голини уриб, ўйинга узил-кесил нуқта қўйди. Дубл эвазига у «Барселона»нинг ЕЧЛдаги тўпурарлари рўйхатида Неймар ва Ривалдони ортда қолдирган ҳолда учинчи ўринга кўтарилди (у ва Левендовскида 23 тадан). Ундан олдинда фақат Суарес (25) ҳамда Месси (120) бор.
Бу ғалаба эвазига «Барселона» очколари сонини 9 тага етказди ва умумий рейтингда иккинчи ўринга жойлашди. Кейинги турда Флик шогирдлари Бокуда «Сабоҳ» меҳмони бўлади, «Вилла» эса «Галатасарой»га қарши ўйин учун Истанбулга сафар қилади.
«МЮ» «Рома»га қарши ўйиннинг 17-дақиқасига келиб икки тўп фарқи билан ортда бораётганди ва кўпчилик жамоанинг навбатдаги шармандалигига тайёрланаётганди.
Стадионга келган мухлислар майдонга теннис тўплари ва чиқиндилар улоқтиришди.
Бўлим охирида ҳисоб 0:3 кўринишини олиши ҳам мумкин эди, аммо ўйиндаги биринчи гол муаллифи Соуленинг зарбасидан кейин тўп устун ва тўсин туташган нуқтага тегди.
Иккинчи бўлим бошида мезбонларда муаммолар давом этди – Балеба «Рома» дарвозабони билан яккама-якка вазиятга чиқиб борди, аммо зарба бера олмади ва белини ушлаб тўхтаб қолди. «МЮ»нинг ёздаги энг қимматбаҳо хариди алмаштиришни сўради.
Аммо иккинчи бўлимда Матеус Куня вазиятни ўзгартирди. Бразилиялик футболчи аввалига пеналти ишлади ва Бруну Фернандеш ҳисобни қисқартирди. Португалиялик яримҳимоячи биринчи уринишда тўғри зарба бера олмаганди, аммо унинг бахтига зарба ижро этилишидан олдин «Рома» футболчиси жарима майдонига кириб кетгани маълум бўлди ва зарба такроран ижро этилди.
Ўйин охирида эса драма юзага келди. 83- ва 86-дақиқаларда Куня дублни расмийлаштириб, бироз олдин майдонга турли буюмларни улоқтирган мухлислар бағрига отилди ва камбэкни нишонлади. 90+1-дақиқада эса оқшом қаҳрамони иккинчи сариқ карточкани олишга ҳам улгурди. Биринчиси голни нишонлаш вақтида футболкасини ечиб ташлагани учун берилганди.
Якунда «МЮ» сўнгги 10 ўйиндаги илк ғалабасига эришди. Жамоанинг охирги ғалабаси сентябр ойи бошида – ЕЧЛда «Сабоҳ»га қарши ўйинга тўғри келганди. «Юнайтед» ғалабасиз серия бўйича 42 йиллик антирекордини такрорлашига оз қолганди, аммо бунга Куня қарши чиқди.
Кейинги турда «МЮ» «Спортинг» майдонига сафар қилади – Бруну Фернандеш ўз собиқ жамоасига қарши майдонга тушишига тўғри келади. «Рома»ни эса «ПСЖ» майдонига қийин сафар кутмоқда.
Турнинг марказий баҳси «Атлетико»нинг хавфли ҳужуми билан бошланди, аммо Алвареснинг айлантириб йўлланган зарба бироз хато кетди. Ўз навбатида, Кейнга ҳам аниқлик етишмади. Биринчи бўлимда бошқа голли вазиятлар бўлмади, «Бавария» эса 45 дақиқа ичида бирорта дарвоза соҳасига тўғри борган зарба йўллай олмади.
Аммо иккинчи бўлимда мадридликлар ҳимоясидаги хатолар ўйин тақдирини ҳал қилди. Аввалига Ле Норман тўпни жарима майдонидан узоқлаштиришда сусткашликка йўл қўйди ва Карл бундан фойдаланиб, тўпни Облак устидан ошириб дарвозага йўллади.
Бироз ўтиб эса мезбон жамоа ҳимоячилари чап қанотда Лаймерни ёлғиз қолдиришди ва у қайтариб бўлмас зарбани тайёрлаш учун етарлича вақтга эга бўлди – 0:2.
«Атлетико» барча турнирлар доирасида тўққиз ўйин (8 ғалаба ва бир дуранг) давом этган мағлубиятсиз сериясини тўхтатди. Қолаверса, бу Диего Симеоне шогирдлари учун ўз тарихида илк бор «Бавария»га ўз майдонида мағлуб бўлиши бўлди. Бунгача мадридликлар мюнхенликларга қарши ўз уйида ўтказилган ўйинларда икки ғалаба ва бир дурангга эришганди. Умуман, жамоа немисларга сўнгги бор 1996/97 йиллар мавсумида ютқазган, ўшанда «Боруссия» Мадриддан ғалаба билан қайтганди (0:1). Шундан кейин Германия клубларига қарши ўйинларда 12 ғалаба ва тўрт дуранг қайд этилган. Энди эса «Бавария» ушбу нохуш анъанага чек қўйди.
Ҳарри Кейн эса ЕЧЛда Криштиану Роналдуга тегишли бўлган голли серияни такрорлай олмади. Англиялик ҳужумчи бунгача Чемпионлар лигасида қаторасига 10 ўйинда гол урганди, аммо ўн биринчиси бўлмади.
«Атлетико» тўрт турда атиги 4 очко жамғарди ва тур якунларига кўра плей-офф чегарасидан чиқиб кетиши мумкин.
Кейинги турда «Атлетико» «Викинг»ни қабул қилади, «Бавария» «Лилл» меҳмони бўлади.
«Вилярреал» ўз уйида «ПСЖ»га ҳеч қандай қаршилик кўрсата олмади – 0:6. Парижликлар ўйин масаласини шу қадар тез ҳал қилишдики, 15-дақиқадаёқ захира ўйинчиларини майдонга туширишни бошлаши мумкин эди.
Луиса Энрике шогирдлари ўйиндаги илк имкониятдан гол уришди: тўққизинчи дақиқада бурчак зарбаси ижро этилди ва Жоау Невеш ҳисобни очди. Кейин эса мезбонлар дарвозабони Петер Гулачи қисқа вақт ичида икки бор тўпни узоқлаштиришда хатога қўл қўйди: Дезире Дуэ 12-дақиқада, Санни Меюлю 13-дақиқада ўз номларига биттадан гол ёздиришди.
«Вилярреал» устози Инииго Перес тезкор реакция кўрсата олмади ва парижликлар гол уришда давом этишди: 17-дақиқада меҳмонлар яна рақибни прессинги билан хатога мажбур қилди ва бу сафар Фабиан Руис ҳисобни янада йириклаштирди.
Испаниялик футболчи голини нишонламади ва қўллари билан осмонга ишора қилди. У шунингдек бармоқлари билан «тўққиз» рақамини кўрсатди – бу орқали у «Тенерифе»нинг тўққизинчи рақамли ҳужумчиси, ўйин вақтида вафот этган Хесус де Мигелни хотирлади. Ўйиндан олдин мухлислар ҳам бир вақтнинг ўзида икки фожиа юзасидан сукут сақлашганди: де Мигел ва Толедодаги темирйўл ҳалокати қурбонлари хотираси учун.
Иккинчи бўлим бошида Руис иккинчи голини урди, захирадан тушган 17 ёшли Давид Боли якуний ҳисобни ўрнатди – 0:6.
Кейинги турда «ПСЖ» уйда «Рома» билан ўйнайди, «Вилярреал»ни «Славия» майдонига сафар кутмоқда.
Ўтган ҳафта охирида ички чемпионатда «Милан»га қарши дербини бой берган (1:3) «Интер» аламини «Фейеноорд»дан олди – 0:3.
Италянлар саккизинчи дақиқадаёқ ҳисобни очишди: ҳимоячи Янн Биссек рақиб жарима майдонида пайдо бўлиб, олис устун томон аниқ зарба йўллади. Танаффус арафасида Франческо Эспозито ҳисобдаги фарқни иккитага оширди, иккинчи бўлим бошида Петр Зелински ўйин масаласига нуқта қўйди.
Ҳолбуки миланликлар xG бўйича катта устунликка эга бўлмаганди – 0,68 га қарши 0,94. Аммо вазиятларидан фойдаланган меҳмонлар иккинчи бўлимда ўйиннинг боришни ишонч билан назорат қилишди.
Кейинги турда «Интер» уйда «Штутгарт», «Фейеноорд» – «Порту» билан ўйнайди.
ЛАСК «Слован»га ҳеч қандай имконият қолдирмади – 4:0. Словаклар – тўрт ўйинда тўрт марта ютқазиб (1:17), лига аутсайдери мақомини мустаҳкамлади.
Австрияликлар биринчи бўлимдаёқ ҳисобни йирик кўринишга келтирди: Каспер Йергенсен дубл муаллифи бўлди, Роберт Любичич танаффус арафасида учинчи голни урди. Танаффусдан кейин ҳам фақат ЛАСК гол урди. Мезбонлар шу куни жами 29 бор зарба беришди ва кутилган голлар бўйича 4,7 xG кўрсаткичини қайд этишди.
«Слован» Чемпионлар лигасида ўзи иштирок этган барча 12 учрашувда ютқазган ва ҳар сафар биринчи бўлимдаёқ гол ўтказиб юборган. Ушбу жамоа умуман турнир даражасига мос келмаяпти.
ЛАСК эса ўтган турда турнирдаги илк ғалабасини нишонлаганди – ўшанда «Спортинг» майдонида 3:2 ҳисобида ғалабана эришилганди. Энди очколари сонини 6 тага етказган австрияликлар плей-оффга чиқиш ҳақида ўйлай бошлади.
Кейинги турда «Слован» «Бетис»ни қабул қилади, ЛАСК «Будё-Глимт» меҳмони бўлади.
«Галатасарой» ўз уйида «Штутгарт»ни мағлуб этди – 2:0.
Ёзги трансферлар чоғида Туркияга келган россиялик Алексей Батраков «Галатасарой» сафида ажойиб статистика қайд этмоқда – 5+2. Бу голлар орасида ЕЧЛда «Барселона» ва «Лилл»га урилган голлар ҳам бор.
Батраков бу ўйинда ҳам дастлаб 12-дақиқада рақиб ҳимоясидан қайтган тўпга эга чиқди ва яқин тўққизликни аниқ нишонга олди. У бу голини ҳам ўз стилида – рақибга «хайрли тун» тилаб нишонлади.
Уч дақиқа ўтиб Давинсон Санчеснинг идеал узатмасидан кейин тўпни дарвозабон оёқлари орасидан ўтказиб, ўйин тақдирини ҳал қилди.
Кейинги турда «Галатасарай» «Астон Вилла»ни қабул қилади, «Штутгарт» сафарда «Интер» билан ўйнайди.
Украинлар жамоаси рақибга қараганда кўпроқ зарба берди (14:11), ўйиннинг кўпроқ вақтида тўпга эгалик қилди (54 фоиз) ва кутилган голлар бўйича ҳам яхшироқ натижага эришди (1,3 га қарши 2 xG), аммо битта ҳам гол уролмади. 59-дақиқада Исса Думбия томонидан урилган гол ўйинда ягоналигини сақлаб қолди. Ушбу 23 ёшли яримҳимоячи учун бу ЕЧЛда иккинчи гол бўлмоқда, ўтган турда у «Ланс»ни мағлуб этишга ёрдам берганди (2:0).
Кейинги турда «Спортинг» «МЮ»ни қабул қилади, «Шахтёр» «Стэмфорд Бриж»да «Фенербаҳче» билан ўйнайди.
Бу оқшомнинг голсиз якунланган ягона учрашуви бўлди. Ўйин амалда ҳам тенг кечди – xG бўйича кўрсаткич 0,51 ва 0,58. Тўпга эгалик қилиш кўрсаткичи ҳам 50 га 50 кўринишида эди. Ҳолбуки голсиз дуранг ушбу жамоалар учун хос ҳисоб эмасди: «Будё» ва «Лилл» иштирокида Чемпионлар лигасида бўлиб ўтган охирги 10 та ўйинда жами 39 гол урилган – бир ўйинга ўртача 3,90 гол.
Бу дуранг орқали «Лилл» турнирдаги илк очкосини қўлга киритди, норвегларда учта очко кўпроқ.
Кейинги турда «Будё» Австриянинг ЛАСК клубига қарши ўйнайди. «Лилл» уйда «Бавария»ни тўхтатишга ҳаракат қилиб кўради.
