ФИФА Россияда ўтадиган ЖЧ-2018’да видеотакрорлар тизими жорий этилишини тасдиқлади

Халқаро футбол федерацияси (ФИФА) тижорат директори Филипп Ле Флок ҳакамларга видеокўмак бериш тизими (VAR) Россияда ўтадиган 2018 йилги жаҳон чемпионатида аниқ жорий этилишини таъкидлади, дея унинг сўзларини келтирмоқда Associated Press агентлиги.

Душанба куни Цюрихда ўйин қоидалардаги ўзгаришлар учун масъул бўлган Футбол ассоциациялари халқаро Кенгаши (IFAB) нинг ҳар йиллик бизнес-учрашуви бўлиб ўтди, унда турли масалалар билан бирга VARни келаётган жаҳон чемпионатида ва миллий чемпионатларда жорий қилиш масаласи муҳокама қилинди. Илгарироқ Британиянинг The Times газетаси IFAB аъзолари технологиянинг Россияда ўтажак жаҳон чемпионатида қўлланилишини ёқлаб овоз беришлари ҳақида хабар берган эди. Нашр, шунингдек, ФИФА VAR тизимини ЖЧ-2018 да тақдим этишни жуда-жуда хоҳлаётганини таъкидлаган эди.

«Видеотакрорлар тизимидан [жаҳон чемпионатида] аниқ фойдаланамиз. Фикримча, технологиялар футболга жорий этилаётгани жуда ажойиб, улар ўйинни янада адолатлироқ қилади», — деган Ле Флок.

Ле Флок шунингдек, ФИФА VAR тизимини жаҳон чемпионатида жорий этишга кўмаклашувчи потенциал ҳомийлар билан музокаралар олиб бораётганини хабар қилган. «Биз турли компаниялар билан музокаралар олиб бормоқдамиз. Улар футболнинг технологик томонлари билан боғлиқ масалаларда ФИФА билан ҳамкорлик қилишга зўр қизиқиш билдиришмоқда», — деган ташкилотнинг тижорат директори.

2016 йил мартида IFAB ҳакамларга видеокўмак тизимини синовдан ўтказишни маъқуллаган эди. Тизим 2016 йил Японияда ўтган клублар ўртасидаги жаҳон чемпионатида ва 2017 йил Россияда ўтган Конфедерациялар кубогида синалди. Айни пайтда Европанинг етакчи чемпионатларидан Италия ва Германияда видеокўмак тизими ишламоқда.

Футбол бўйича жаҳон чемпионати ўйинлари 2018 йилнинг 14 июнидан 15 июлига қадар Россиянинг 11 та шаҳрида бўлиб ўтади.