Халқаро футбол федерацияси (ФИФА) президенти Жанни Инфантино янги муддатга қайта сайланган тақдирда ҳам футбол бўйича жаҳон чемпионатларидаги жамоалар сонини 64 тага оширмасликка қарор қилди. Бу ҳақда у спорт федерацияси президиуми аъзоларига маълум қилган, деб хабар берди Британиянинг The Times газетаси ўз манбаларига таяниб.
Инфантино чемпионатни кенгайтириш режалари ҳақида 11 июль куни чоп этилган blue Sport порталига берган интервьюсида сўз очган эди.
«48 та терма жамоа иштирокидаги турнир жуда муваффақиятли чиқди. Барча жамоалар юқори савиядаги ўйин намойиш этди. Ҳар бир қитъа вакиллари гол уриб, камида биттадан очко жамғарди. Африканинг ўнта жамоасидан тўққизтаси плей-офф босқичига йўл олди. Ваҳоланки, аввалги жаҳон чемпионатида Африка шарафини бор-йўғи бешта жамоа ҳимоя қилган эди. Бу барча жамоаларга имкон бериш ва уларнинг жаҳон чемпионатида тўп тепишини таъминлаш нақадар муҳимлигини яна бир карра исботлайди», — деган эди ФИФА раҳбари июль ойида.
The Times нашрининг ўша пайтдаги тахминига кўра, Инфантино ЖЧ улушларни хусусий инвесторларга сотиш режалари туфайли юзага келган можародан сўнг иккинчи ва учинчи тоифадаги футбол ассоциациялари қўллаб-қувватлашига эришиш мақсадида чемпионатни кенгайтирмоқчи бўлган. Дастлаб мундиални кенгайтириш лойиҳаси билан Жанубий Америка футбол конфедерацияси (CONMEBOL) чиққан, аммо Европа футбол ассоциациялари иттифоқи (УЕФА) ва Осиё футбол конфедерацияси (AFC) бунга қаршилик билдирган.
