Бугун АҚШ Молия вазирлиги Конгрессга 210 россияликдан иборат «Кремль маърузаси»ни тақдим этди. Америка ҳукумати фикрича, ушбу шахслар Россия президенти Владимир Путин билан яқин алоқаларга эга ҳисобланади. Ушбу рўйхатга киритилган шахсларга нисбатан келажакда АҚШ томонидан турли чекловлар ва санкциялар қўлланилиши мумкин. Ҳозирча ушбу рўйхат бутун дунёдаги молия ташкилотлари учун тавсиявий характер касб этади — улар ушбу рўйхатдан ўз қарорларини қабул қилишда фойдаланиши мумкин. Россия томони АҚШнинг бу хатти-ҳаракатларини 2018 йилда кутилаётган «президент сайловига халал беришга уриниш» деб баҳоламоқда. Рўйхат ўтган йилнинг ёзидаёқ тузиб бўлинганди, шу туфайли буни АҚШ ва Россия муносабатларидаги янги қадам, деб ҳам бўлмайди.
Рўйхатда 200дан ортиқ ном
Ҳужжат 114 нафар йирик мансабдор ва давлат компаниялари раҳбарлари, шунингдек, 96 нафар олигархни қамраган. Рўйхатда номи қайд этилган амалдорлар орасида президент маъмурияти раҳбари Антон Вайно, унинг биринчи ўринбосарлари Сергей Кириенко ва Алексей Громов, президентнинг матбуот котиби Дмитрий Песков, президент маслаҳатчилари Андрей Белоусов, Владислав Сурков, Юрий Ушаков, Андрей Фурсенко, Герман Клименко ҳам бор. Россия президентининг тадбиркорлар ҳуқуқи бўйича вакили Борис Титов ва инсон ҳуқуқлари бўйича кенгаш раҳбари Евгений Федотов ҳам «Кремль маърузаси»да.
Рўйхатга Россия ҳукумати тўлиқ таркибда кирган
Бош вазир Дмитрий Медведев, бош вазирнинг биринчи ўринбосари Игорь Шувалов, бош вазир ўринбосарлари Александр Хлопонин, Виталий Мутко, Аркадий Дворкович, Ольга Голодец, Дмитрий Козак ва Дмитрий Рогозин — уларнинг барчаси маъруза рўйхатида. Шунингдек, барча федерал вазирлар, иқтисодий ривожланиш вазиридан тортиб Спорт вазиригача бўлган 22 вазир ушбу рўйхатда (Максим Орешкин, Михаил Абизов, Ольга Васильева, Александр Галушка, Сергей Донской, Александр Колокольцев, Александр Коновалов, Лев Кузнецов, Сергей Лавров, Денис Мантуров, Владимир Мединский, Михаил Мень, Николай Никифоров, Александр Новак, Владимир Пучков, Антон Силуанов, Вероника Скворцова, Максим Соколов, Александр Ткачев, Максим Топилин, Сергей Шойгу ва Павел Колобков). Федерал вазирлардан ташқари ушбу рўйхатга қуйидагилар кирган: Федерация кенгаши раҳбари Валентина Матвиенко, Давлат думаси раиси Вячеслав Володин, Ташқи разведка хизмати директори Сергей Наришкин, президентнинг экология бўйича махсус вакили Сергей Иванов, Россия хавфсизлик кенгаши (Совбез) котиби Николай Патрушев, Санкт-Петербург мэри Георгий Полтавченко, Москва мэри Сергей Собянин, Миллий гвардия раҳбари Виктор Золотов, ФСБ раҳбари Александр Бортников, бош прокурор Юрий Чайка ва бошқалар.
«Амалдорлар» сифатида 20та давлат компанияси раҳбарлари
