АҚШнинг Бош бейсбол лигасида (MLB) иштирок этувчи “Кливленд Индианс” клуби 2019 йилдан бошлаб ўйинчиларнинг кийимлари, кепкалари ва уй стадионида қўлланган “Ваху сардори” логотипини қўллашдан тўхтайди. Клуб ушбу логотипи учун бир неча бор ирқчиликда айбланган: унда табассум қилиб турган қизил танли ҳинду тасвирланган.
Клуб ушбу логотипли атрибутикани стадиондан ташқарида сотишда давом этади. Клуб шундай йўл билан ҳинду тасвирига ҳуқуқни қўлдан бой бермайди ва уни “учинчи томон” қўллашига ижозат бермайди. Бироқ эски логотипдаги барча маҳсулот MLB сайтидан олиб ташланади.
The New York Times нашри маълумотларига кўра, клуб эгаси Пол Долан ушбу логотипнинг кийимлардан олиб ташланиши таклифига узоқ вақт қаршилик қилган. Бироқ MLB вакили Роб Мэнферднинг айтишича, клуб охир-оқибат лиганинг бу масала бўйича таклифига розилик берган.
Америкалик ҳиндулар ҳаракатининг Оҳайо штатидаги (Кливленд шаҳри жойлашган) раҳбари клубнинг бу қарорини қўллаб-қувватлаган. У келгусида клуб номи – “Индианс”ни (Ҳиндулар) ҳам ўзгартириш кераклигини айтган.
Ҳинду образи клубнинг логотипида 1928 йилдан бери бор бўлган, 1948 йилда эса клуб кийимида 70 йилдан бери қўлланиб келинган “Ваху сардори” персонажи пайдо бўлган. Шу йиллар ичида бу логотип дунёдаги энг машҳур спорт қиёфаларидан бирига айланиб улгурган, бироқ клуб охирги йилларда уни камроқ қўллаб келган. Мисол учун, 2014 йилда клубнинг асосий рамзи “С” ҳарфи бўлган, “ҳинду” эса муқобил вариант сифатида қолдирилган.
АҚШда кўплаб спорт жамоаларининг номлари ва логотипларида ҳиндуларга ишора бор. Охирги йилларда ирқчиликдаги айбловлар сабабли улар ўзгартира бошланган: бир неча университет жамоалари ўз атрибутикаларидан ҳиндулар билан боғлиқ барча эслатмаларни олиб ташлашган. 2015 йилда АҚШ миллий футбол лигасининг “Вашингтон Редскинз” (қизил танлилар) клубидан номини ўзгартириш талаб қилинган, бироқ клуб олий суд орқали ўзининг тарихий номини сақлаб қолишга эришган.
