Лекин ўйин бошланиши билан ҳамманинг кўзи «Спортинг» сафидаги 28 рақамли, ўзига бироз катта футболкани осилтириб кийиб олган озғин йигитчада. 25-дақиқада ана шу йигитча Луиш Фелипега голли узатма бергач, ҳисоб очилади. Биринчи бўлимнинг ўзида 28-рақамли вундеркинд пеналти ишлайди ва Пинту яна гол уради.
Танаффусда «МЮ» афсоналари Фердинанд, Гиггз, Скоулз ва Кин ўйинни муҳокама қилиш ўрнига Фергюсондан рақиб сафидаги 28-рақамли болакайни сотиб олишни сўрайди. Кейинроқ эслашларича, бу афсоналар сэрни кўндирмагунча фикридан қайтмаган. Фергюсон бу ишни ҳал қилмай стадиондан кетмасликка сўз беради. Ўша ўйиндан олти кун ўтиб «МЮ» 12 миллион фунт эвазига «Спортинг»дан ўша вундеркиндни сотиб олади.
Бу ҳали ҳаммаси эмасди. Роналду «МЮ»га қарши ўйиндан 10 кун ўтиб энди «МЮ» сафида АПЛда «Болтон»га қарши ўйинда дебют қилади. 4 кун ўтиб эса йигитча Қозоғистонга қарши ўйинда Португалия миллий жамоаси сафида илк бор майдонга тушади. Ўша пайтлар кўпчилик Рикарду Куарежманинг ажойиб ўйинларидан ҳайратланиб юрар, вақти келиб Роналду Португалия миллий жамоаси сафида 234 та ўйин ўтказиб, 146 та гол уришини тасаввур ҳам қилолмасди.
Ахир миллий жамоа сафида 100 та ўйин ўтказишнинг ўзи эртакнамо натижа, энг яхши тўпурарлар эса 30-40 та гол урган бўларди-да. Лекин Роналду чегараларни писанд қиладиган оддий футболчи эмас, инсоният тарихидаги энг зўр атлетлардан бири бўлиб чиқди.
Бугун эса ана шу тирик афсона атрофида спортга хос бўлмаган ёқимсиз интрига авж олди. Роналду кутилмаганда миллий жамоа лагерини тарк этди, очиқчасига хафа бўлиб кетди, кейинчалик нима бўлганини айтиб бераман, деб сирли тарзда кетди.
Ҳурматсизлик
Барчаси Роналду Норвегияга қарши ўйинда захирада қолишидан бошланди. 2008 йилдан буён Роналду қайсидир ўйинни тўлиқ захира ўриндиғида ўтказмаганди, шу сабаб мураббийнинг бу қарори катта шов-шувга сабаб бўлди. Мураббий ҳам бегона эмас, Роналду билан Саудия чемпиони бўлган Жезуш. Криштуану мураббий уни кейинги ўйинда ҳам туширмаслигини билгач, миллий жамоа қароргоҳидан чиқиб кетган.
Мураббий футболчи билан ҳеч қандай келишмовчилик йўқ эканини айтмоқда, лекин унинг сўзларидан гап нимада эканини тушуниш қийин эмас. «Бу ерда мен бошман, ҳеч бир футболчи ёки президент режамни ўзгартира олмайди», деди Жоржи Жезуш. Албатта, футболда таркибни мураббий танлайди, керак бўлса, «Реал» афсонаси Касиляс захирада ўтирганини ҳам кўрганмиз. Шунчаки бу гал захирада қолган шунчаки футболчи эмас, дунёда энг кўп кузатиладиган спортчи экани вазиятни ўзгартирди.
Португалия Роналдусиз ўтган икки ўйинда ҳам ғалаба қозонди, мураббийга ҳеч қандай эътироз йўқ. Лекин Данияга қарши ўйинда жуда хунук воқеа содир бўлди. Рафаэл Леау 7-рақамли футболкада майдонга тушди. У 17-рақамда ўйнарди, қайсидир футболчи 7-рақамни олиши мажбурий эмасди. Афтидан, Португалия футболи раҳбарлари ва бош мураббий Жезуш ҳужумчини 7-рақамни олишга ундаган. Бу эса очиқчасига Роналдуга нисбатан ҳурматсизлик эди.
