Бир турда 2 марта мағлуб бўлган Жиру, Санчеснинг омадсиз дебюти. Англияда тур воқеалари

ПОГБА ҚАЕРДА ЎЙНАШИ КЕРАК?

Кеча, инглиз журналистларининг эътибори «Тоттенҳэм»га қарши ўйин пайтида Поль Погбани койиётган Жозе Моуриньога қаратилди. Португалиялик мутахассис шогирдининг ҳимояланишда ўз позициясини йўқотиб қўяётганидан норози бўлаётганди.

Умуман франциялик юлдузнинг ҳимояланишдаги хатолари ҳақида мавсум бошидан бери айтилиб келинмоқда, аммо ҳамма айб футболчидами? Табиатан бундай вазифаларга мос бўлмаган Погбанинг таянч зонасида Матичга шерик сифатида танланиши қанчалик тўғри?

Ҳимояланувчи жамоаларга қарши бу схема яхши иш беради, Погба кўпроқ тўп билан муомала қилиши ва ҳужумларни бошлаши мумкин. Лекин «Тоттенҳэм» каби кучли жамоаларга қарши Погба бироз эркинроқ ва олдинроқда ўйнаши мақсадга мувофиқ бўларди, балки. Погба айнан икки марказий ярим ҳимоячининг олдида ҳаракат қилган ўйинларда янада фойдалироқ бўлганди. Мисол учун, «Арсенал» билан ўйинда уч ҳимоячи схемаси, «Эвертон» билан сафардаги ўйинда эса, Погба икки таянч ярим ҳимоячининг олдида тўп сурган – бу ўйинларда «МЮ» ғалаба қозонибгина қолмай, Погба 4 голли узатмани амалга оширганди.

Албатта, Моуриньо бу фарқни пайқамаслиги мумкин эмас, шунчаки, Санчеснинг таркибга қўшилиши мураббийга халақит бергандек бўлди. Аслида Санчес Марсиял ёки Лингарддан бирининг захирада қолиши эвазига майдонга тушиши мақсадга мувофиқроқ бўларди, аммо Моуриньо яхши спорт формасида бўлган бу икки футболчидан бирини захирада ўтказиш, гўёки Санчеснинг келиши билан боғланган ҳолда тушунилишини истамади чоғи. Натижада, «Тоттенҳэм»дек кучлим рақибга қарши 4 ҳужумкор футболчи туширилди, марказ Погба ва Матичга қолиб кетди. Бундай очиқ зонадан «Бёрнли» ҳам жуда яхши фойдаланган, аммо вазиятларни голга айлантира олмаганди.

Уй учрашувларида «МЮ»нинг кечагига ўхшаш таркибда ҳали кўп кўрсак керак, лекин масалан, Чемпионлар Лигасида ёки кучлироқ рақибга қарши Моуриньо бу хатони яна такрорламаслиги шубҳасиз.

«ЎХШАМАГАН» ДЕБЮТЛАР

30-31 январь кунлари тур ўйинлари бўлиб ўтиши Антонио Контега ёқмади. Трансфер бозори айнан қизиган пайтда мавҳумлик ҳолатида бўлган баъзи футболчилар ва жамоалар учун жуда ноқулай бўлади, мураббийнинг айтишича. 

«Борнмут» «Стэмфорд Бриж»да «Челси» дарвозасига 3та жавобсиз гол урди ва ўнликка кирди. Ҳолбуки, Эдди Ҳау шогирдлари бир ой муқаддам турнир жадвалида «хавфли ҳудуд»да эди. «Челси» бу ўйинни қутқара олмасди, чунки на майдонда, на захирада номинал ҳужумчи бор эди. Жамоанинг янги ҳужумчиси Жиру захира ўриндиғида ўтирди, у заявкага киритилмаганди. Франциялик бу футболчи амалда бу мағлубиятда айбдор эмас. Амалда Жиру 1 тур доирасида ўз жамоасининг икки мағлубиятига гувоҳ бўлди: сешанба куни унинг жамоаси «Арсенал» «Суонси»га 1:3 ҳисобида ютқазганди, чоршанба куни эса «Челси» «Бортнмут»га 0:3 ҳисобида.

25-тур бир қатор футболчиларнинг янги жамоадаги дебютлари билан ёдда қолди ва айтиш керакки, аксарият ҳолларда омадсиз бўлди.

Генрих Мхитаряндан бошлаймиз.

«Суонси»даги ҳисоб 1:1 бўлиб турганида арманистонлик футболчи захирадан майдонга туширилди ва орадан 40 сония ўтмасдан, мезбонлар ҳисобда олдинга чиқиб олишди. Ўйин охиригача уэльсликлар учинчи голни ҳам уриб, Мхитарянни яқинда нишонланган туғилган куни билан «табриклашди».

Алексис Санчеснинг янги либосдаги илк сониялари ундан-да даҳшатли кечди.

«Йовил»га қарши ўйинда илк ўйинини ўтказиб, ҳатто голи пас муаллифи бўлган чилилик ҳужумчининг АПЛ доирасидаги дебютининг 11-сонияси рақибнинг голи билан ниҳояланди. Санчес бу ўйинда бутунлай бошқа жамоадошлар билан ўйнаганини таъкидлаш жоиз, «Йовил»га қарши майдонга тушган таркибдан фақат Санчес қолганди, бошқа 10 футболчи алмаштирилганди.

Яна бир дебютант – Росс Баркли.

Ярим ҳимоячи Англия кубоги ва Лига кубоги ўйинларида майдонга тушган. «Борнмут»га қарши ўйин унинг «Челси» либосида АПЛдаги илк ўйини эди. Меҳмонлар ҳисобни 2:0га етказишгач, Конте уни алмаштириб юборди. Баркли жамоа таркибида энг паст баҳо олган икки футболчидан бири бўлди.

Айтганча, аввалги турда «Ливерпуль» сафида АПЛдаги илк ўйинида майдонга тушган дунёнинг энг қимматбаҳо ҳимоячиси Виржийл ван Дейк ҳам мағлубият билан бошлаганди. Кеча Юрген Клопп уни асосий таркибда туширмади.

Шу куни илк ўйинини ўтказган футболчилар орасида «Манчестер Сити»га атиги 2 кун олдин қўшилиб, асосий таркибда тушган Эмерик Лапортни мақтаб қўйиш керак. Унинг жамоаси йирик ҳисобда ғалаба қозонди ва бирорта ҳам гол ўтказиб юбормади. Киройи дебют...

Энди, Обемеянг, Жиру ва Моуранинг дебютини кутиб қоламиз.     

ХУШ КЕЛИБСАН, ТЕО

«Арсенал»дан «Эвертон»га ўтган Тео Уолкотт эса илк ўйинлардаёқ жамоани ўз ортидан эргаштиришни бошлаб юборди.

Ўтган турда илк бор кўк либосни кийган футболчи «Вест Бромвич» дарвозасига урилган ягона голга ассисентлик қилганди. «Лестер»га қарши 25-тур ўйинида эса, унинг икки голи «Эвертон»га ғалаба олиб келди.

Эллардайс шогирдлари охирги ғалабага бундан қирқ кун муқаддам эришганди. Ниҳоят 8 ўйинлик ғалабасиз серияга чек қўйилди.

«Сити» «МЮ»дан 15 очко олдинда

«МЮ» ютқазди, қўшниси ютди. Демак, «Манчестер Сити» орадаги фарқни 15 очкога етказди. «Шаҳарликлар» «Вест Бромвич»ни осонлик билан енгди ва бу мавсумда урган голлари сонини 100тага етказди – бу Англиядаги энг юқори кўрсаткичдир. Бу ўйинда Лапорт – 57 миллион фунт эвазига «Атлетик»дан харид қилинган баск ҳимоячиси дебют қилди, унинг дебюти жуда омадли келди. «Биз унга кўп тўлаганимиз ҳақида гапиришмоқда. Аммо у ҳали ўзини арзонроққа олганимизни исботлар», – деди ўйиндан кейин Пеп Гвардиола.

ҲАФТА ВОҚЕАСИ

Шундоқ ҳам жуда кўп гапирилган трансферлардан ташқари, Риёз Маҳрез билан бўлган воқеа давомида жанжалли тусга айланиб кетиши ҳам мумкин.

Лерой Саненинг жароҳати ва узоқ муддатга сафдан чиқиши Пеп Гвардиолани режалаштирилмаган трансферга ундади ва «Манчестер Сити» эътибори «Лестер» ярим ҳимоячиси Риёз Маҳрезга қаратилди. Манчестерликлар жазоирлик ўйинчи учун 3 марта таклиф юбордилар ва ҳатто футболчининг трансфер қиймати 65 миллион фунтгача кўтарилди. Аммо «Лестер» ўз етакчисини янада баландроқ баҳолади (95 миллион фунт) ва «Сити» бу трансфердан воз кечишга қарор қилди.

Mirror тарқатаётган хабарларга қараганда, жараённинг бундай тус олиши Маҳрезга умуман ёқмаган ва қаттиқ жаҳли чиққан. Риёз «Лестер»нинг уни қўйиб юбормаганидан норозилигини ошкора намоёи қилмоқчи ва ҳатто бундан кейин «Лестер» либосида умуман майдонга тушишни истамаяпти.

Тур ўйинлари

«Суонси» - «Арсенал» - 3:1 (1:1).
Голлар: Монреаль, 33 (0:1). Клукас, 34 (1:1). Айю, 61 (2:1). Клукас, 86 (3:1). 
«Ҳаддерсфилд» - «Ливерпуль» - 0:3 (0:2).
Голлар: Эмре Жан, 26 (0:1). Роберту Фирмину, 45+1 (0:2). Салоҳ, 78 - пенальти (0:3).
«Вест Ҳэм» - «Кристал Пэлас» - 1:1 (1:1).
Голлар: Бентеке, 24 (0:1). Нобл, 43 - пенальти (1:1).
«Манчестер Сити» - «Вест Бромвич» - 3:0 (1:0).
Голлар: Фернандинью, 19 (1:0). Де Брейне, 68 (2:0). Агуэро, 89 (3:0).
«Стоук Сити» - «Уотфорд» - 0:0.
«Тоттенҳэм» - «Манчестер Юнайтед» - 2:0 (2:0).
Голлар: Эриксен, 1 (1:0). Жоунс, 28 - автогол (2:0).
«Эвертон» – «Лестер» – 2:1 (2:0).
Голлар: Уолкотт, 25 (1:0). Уолкотт, 39 (2:0). Варди, 71 – пенальти (2:1).
«Ньюкасл» – «Бёрнли» – 1:1 (0:0).
Голлар: Ласкеллес, 65 (1:0). Дарлоу, 85 - автогол (1:1).
Аниқ ижро этилмаган пенальти: Хоселу (Н), 34 (дарвозабон).
«Саутҳемптон» – «Брайтон» – 1:1 (0:1).
Голлар: Маррей, 14 – пенальти (0:1). Ж.Стивенс, 64 (1:1).
«Челси» - «Борнмут» - 0:3 (0:0).
Голлар: Уилсон, 51 (0:1). Станислас, 64 (0:2). Аке, 67 (0:3).

Турнир жадвали