Анқара Россиянинг С-400 зенит-ракета мажмуаларини сотиб олгандан кейин CAATSA доирасида АҚШнинг санкциялари таъсири остига тушиши мумкин. Бу ҳақда АҚШ давлат котиби ёрдамчиси Уэсс Митчелл айтиб ўтди.
Шунингдек, юзага келадиган вазият Туркиянинг 5-авлоддаги F-35 қирувчи самолётлари дастурида иштирок этишига салбий таъсир қилиши мумкин.
CAATSA АҚШда 2017 йил августда қабул қилинган “Америка душманларига санкциялар орқали қарши курашиш тўғрисида”ги қонундир.
2017 йил декабрда Анқарада Россия ва Туркия вакиллари С-400 мажмуаларини етказиб бериш бўйича кредит келишуви имзолашган. Туркия мудофаа саноати котибияти баёнотига кўра, Анқара бу мажмуадан 2 та батареясини сотиб олади.
Москва ва Анқаранинг С-400 бўйича мулоқотидан Вашингтон норози бўлмоқда. Пентагон НАТО бўйича ҳамкори бўлган Туркияга С-400 ўрнига “НАТО стандартларига тўғри келувчи” зенит-ракета мажмуаларини таклиф қилишга тайёрлигини айтган.
