Россия ташқи ишлар вазирининг ўринбосари Сергей Вершинин сўзларига кўра, Россия ва Туркия Суриянинг Идлибида жойлашадиган қуролсизлантирилган ҳудуднинг чегараларини белгилашган. Бу ҳақда «РИА Новости» хабар қилмоқда.
Таъкидланишича, қуролсизлантирилган ҳудуд Россия президенти Владимир Путин ва Туркия етакчиси Ражаб Тоййиб Эрдўған ўртасида эришилган келишувга асосан ташкил этилган.
«Қуролсизлантирилган ҳудуднинг чегаралари аниқлаштириб олинди», - дея айтиб ўтди Вершинин.
Унинг қўшимча қилишича, икки мамлакат ҳарбийлари ўртасида «яхши алоқалар» ўрнатилган.
Эслатиб ўтамиз, аввалроқ The Independent газетаси Суриянинг С-300 билан мустаҳкамланиши Яқин Шарқдаги ҳарбий ўйинни ўзгартириши ҳақида ёзганди.
