АҚШ Volkswagen’ни йирик фирибгарликда айблади

Фото: David Gray | Reuters

АҚШнинг Қимматли қоғозлар ва биржалар бўйича комиссияси Volkswagen’ни «катта фирибгарлик»да айблади. Бу ҳақда CNBC хабар қилмоқда.

Қайд этилишича, автомобиль концерни ўзининг америкалик сармоядорларини «дизель можароси» билан боғлиқ равишда бир неча марта алдаган. 2014-2015 йилларда Volkswagen 13 миллиард доллардан зиёд миқдордаги қоғозларни чиқарди, шу билан бирга, компания раҳбарияти АҚШда 500 мингдан ортиқ автомобилнинг ҳавога чиқариб ташланувчи газлар бўйича кўрсаткичи нормадан сезиларли даражада ошганини билган.

Аниқлик киритилишича, комиссия Volkswagen ва унинг собиқ бош директори Мартин Винтеркорнга нисбатан суд жараёнини давом эттириш учун даъво аризаси билан чиққан.

Концерн бу айбловларни «қонуний жиҳатдан хато», деб атади.

Бундан олдин, ЕК Германия автоконцернларини 1 млрд евролик жаримага тортмоқчи экани хабар қилинганди.