Хитойда ўрмон ёнғинини ўчириш чоғида 30 киши ҳалок бўлди

Хитойнинг Сичуан провинциясидаги ўрмон ёнғини қурбонлари сони 30 кишига етди, деб хабар берди ХХР ёнғин хавфсизлиги бошқармаси.

Аввалроқ 24 киши ҳалок бўлгани айтилганди. Ҳалок бўлганларнинг барчаси шанба куни бошланган ёнғинни ўчиришда қатнашаётганлар бўлган.  

Ёнғинга қарши курашишга 690га яқин киши жалб этилган бўлиб, кучли шамол сабабли олов тезлиги ва йўналиши ўзгарганидан сўнг 30 киши бедарак йўқолган. Икки кунлик қидирув ишларидан сўнг уларнинг барчаси ҳалок бўлган деб топилган.

Оловни ўчириш учун кураш ҳали ҳам давом этмоқда.