«Ўзбекнефтегаз»нинг 16 млн доллардан ортиқ қарздорлигини айтаётган China Petroleum Technology & Development Corporation (CPTDC) давлат компанияси ўз даъвосини исботлаши учун судга мурожаат қилиши лозим. Бу ҳақда Ўзбекистон энергетика вазирининг биринчи ўринбосари Жўрабек Мирзамаҳмудов маълум қилди.
Хитой компаниясининг Kun.uz таҳририятига апрель ойида келиб тушган мактубида «Ўзбекнефтегаз» бўлинмаларининг CPTDC (CNPC компаниясининг шўъбаси) олдидаги қарзи еттита шартнома бўйича юзага келганлиги айтилганди. Билдирилишича, CPTDC кўрсатилган кредиторлик қарзлари қопланиши бўйича масала ўзаро тушуниш асосида ҳал этилиши мақсадида кўп бора «Ўзбекнефтгаз» АЖ бошқаруви раиси, «Ўзнефтгазқазибчиқариш», «Ўзгеобурғунефтгаз», «Ўзташқинефтгаз» раҳбарларига хат билан мурожаат қилган.
Мирзамаҳмудов «суд муносабатлари тартиби мавжудлигини ва агарда бирор нарса етказиб берилган бўлса, қарзини ундиришлари мумкин»лигини қайд этди.
«Ўзбекнефтегаз» қарздор дейиш озгина нотўғри. Ўзбекистон ҳар доим вақтида тўлов қилади, буни ҳар қандай халқаро ташкилот тасдиқлаши мумкин. «Лукойл» бўйича масала (600 млн долларлик қарз – таҳр.) ҳозирда ҳал қилинаётган кечикиш бўлса, Хитой компанияси масаласи эса - агарда етказиб берган бўлса, хизмат ва ускуналарни кимга етказиб беришганини исботлашсин», – деди Мирзамаҳмудов.
CPTDC’нинг таъкидлашича, корпорация Ўзбекистон Президенти Шавкат Мирзиёевга ҳам мурожаат қилган. Шундан сўнг, 2017 йилда тегишли музокаралар ўтказилиб, қарздорликни қоплаш жадвали тузилган. Корпорация «Ўзташқинефтгаз»нинг 4 223 473,44 доллар миқдоридаги қарзини 2019 йилга кўчиришга рози бўлган.
Бироқ корпорация баёнотида айтилишича, ҳозирги кунга қадар 11 818 482,36 доллар ўрнига фақат 100 000 доллар ўтказиб берилган.
