Boeing Ле-Бурже авиасалонининг биринчи кунида бирорта ҳам буюртма олмади

Американинг Boeing авиаконцерни Франциянинг Ле-Бурже шаҳрида бошланган халқаро авиасалоннинг биринчи кунида ўз самолётлари учун бирорта ҳам буюртма олмади. Бу ҳақда CNBC телеканали хабар берди.

Компания раҳбарияти ярим йил ичида иккита Boeing 737 MAX самолёти ҳалокатидан сўнг буюртмалар пасайишига тайёргарлик кўрганди, натижа кутилганидан ҳам ёмонроқ бўлди.

Boeing бош директори Деннис Мюлленбург унинг компанияси учун ушбу авиасалон буюртма расмийлаштириш учун эмаслигини, балки мижозларни Boeing сифат ва кўрсаткичларни ошираётганига ишонтириш учун имконият эканлигини билдирди.

Шу билан бир вақтда Boeing’нинг асосий рақобатчиси бўлган Airbus концерни биринчи куннинг ўзидаёқ ўз самолётларини сотиш ва хизмат кўрсатиш бўйича 123 та шартнома имзолади.

Кўплаб давлатларда Boeing 737 MAX самолётларидан фойдаланиш Индонезиядаги (189 киши ҳалок бўлган) ва Эфиопиядаги (157 киши ҳалок бўлган) авиаҳалокатлардан сўнг тўхтатилганди.