Трамп Афғонистондаги ҳарбийларга “сюрприз” уюштирди (видео) 

Афғонистонга кутилмаган ташрифни амалга оширган АҚШ президенти Дональд Трамп Баграмдаги ҳарбий базага келиб, у ердаги америкалик ҳарбийларга “сюрприз” уюштирди. Трамп ҳарбий базада Шукроналик куни муносабати билан ўтаётган кечки овқат вақтида кутилмаганда ошхонага кириб келган, буни кутмаган ҳарбийлар ўрниларидан туриб президентни олқишлай кетишган. 

Трамп ҳарбийлар билан мулоқот қилиб, улар билан суратга тушган.  

Шунингдек, АҚШ президенти ташриф давомида афғонистонлик ҳамкасби Ашраф Ғани билан учрашган. Трампнинг таъкидлашича, у “Толибон” билан музокараларни қайта бошламоқчи, чунки толиблар “келишув тузишни” исташмоқда.

Трампнинг Афғонистонга ташрифи хавфсизлик нуқтаи назаридан эълон қилинмаган.

Оқ уй раҳбарига сафари вақтида рафиқаси Мелания, миллий хавфсизлик бўйича маслаҳатчиси Роберт О'Брайен ва АҚШ қуролли кучлари штаблари бошлиқлари бирлашган қўмитаси бошлиғи Марк Милли ҳамроҳлик қилган.