«Эртагаёқ йўқотинг!»: ОАВда Трампнинг Украинадаги собиқ элчи истеъфосини талаб қилган ёзув пайдо бўлди

АҚШ оммавий ахборот воситаларида АҚШ президенти Дональд Трампнинг овозига ўхшаш овозли одам АҚШнинг Украинадаги собиқ элчиси Мари Йовановичнинг истеъфога чиқарилишини талаб қилган аудиоёзув пайдо бўлди. Ушбу аудиоёзувни ABC телеканали эълон қилди.  

ОАВда таъкидланишича, Трамп билан суҳбат иштирокчилари унинг шахсий адвокати Руди Жулианининг бизнес-ҳамкорлари Лев Парнас ва Игорь Фруман бўлган.

Манбаларнинг маълум қилишича, суҳбат 2018 йил баҳорида Трампга тегишли меҳмонхонада бўлиб ўтган.

Таъкидланишича, ёзувда Парнас ва Фруман Трампга Йованович у ҳақида салбий фикрлар билдираётганини маълум қилишгани, шундан кейин Трамп аччиқланиб, элчининг истеъфосини талаб қила бошлаганини эшитиш мумкин.

“Ундан халос бўлинг! Эртагаёқ йўқотинг. Менга барибир. Йўқотинг. ОК? Буни бажаринг”, деб буюрган Трамп.

Таъкидланишича, Украинада Жулианининг топшириқларини бажарган Лев Парнас Йованович ҳақидаги сўзлари билан Трампнинг аччиғини келтирган. Тадбиркор гўёки Трампга Йованович ҳар бир қулай вазиятда унинг импичмент қилинишини айтаётганини хабар қилган.

Оқ уйда ABC’га ушбу маълумот рад этилмаган ва президент ўз маъмуриятининг унинг фикрига қўшилмайдиган ҳар бир аъзосини лавозимидан бўшатишга ҳақли экани таъкидлаб ўтилган. 

Йованович 2016 йилда аввалги президент Барак Обама вақтида АҚШнинг Украинадаги элчиси этиб тайинланган. Дипломат 2019 йил майда уни лаёқатсизликда айблаган Трампнинг талаби билан ўз лавозимини тарк этган.