ОТБ Ўзбекистон энергетика соҳасини ривожлантириш учун 200 миллион доллар қарз беради

Осиё тараққиёт банки 28 сентябрь куни Ўзбекистон энергетика секторини ривожлантириш 200 миллион доллар қарз ажратишни тасдиқлади. Бу ҳақда банк расмий вакили Kun.uz'га маълум қилди.

Фото: dailytimes

Таъкидланишича, ажратилган 200 миллион доллар мамлакат энергетика соҳасида молиявий барқарорлик ва етарли инвестицион кўмакни таъминлаш учун йўналтирилади.

«Ушбу турдаги кредит Ўзбекистоннинг энергетика соҳасида қийин ислоҳотларни қўллаб-қувватлаш ва хусусий сармояларни чуқурлаштириш учун жуда муҳимдир. Ушбу дастур хусусий сектор иштирокини рағбатлантириш орқали, ҳукуматнинг иш ўринларни яратиш ва аҳоли турмуш сифатини ошириш бўйича якуний мақсадларини қўллаб-қувватлайди. Тоза энергияга ўтиш замонавий ва ишончли энергетик инфратузилмани ривожлантиришни жадаллаштиришга қаратилган ислоҳотларнинг марказида бўлади, бу эса иссиқхона газлари чиқиндиларининг таркибий қисқаришига олиб келади», — дейди банкнинг энергетика йўналиши бўйича мутахассиси Сёнг Дак Ким.

ОТБ «Ўзбекэнерго» ички тузилмасини ислоҳ этиш ҳамда ташкилотнинг институционал ўзгаришини қўллаб-қувватлаб, энергетика соҳасида хусусий капитал кўпайишига интилмоқда.

2020 йил 1 июль ҳолатига Ўзбекистон Республикаси номидан ва унинг кафолати остида жалб қилинган қарз қолдиғи дастлабки ҳисоб-китобларга кўра 19,4 миллиард доллар эквивалентини ёки ялпи ички маҳсулотга (ЯИМ) нисбатан 34,0 фоизни ташкил этди. Шу пайтгача, Ўзбекистон давлат ташқи қарзининг 3,9 миллиард доллар қисми ОТБдан олинган.