Фарғонада таэквондо бўйича Ўзбекистон чемпиони жарима майдонидан мотоциклни ўғирлаб кетди

Спортнинг Taekvondo WTF тури бўйича Ўзбекистон чемпиони ва Осиё чемпионати совриндори бўлган Ж. ўта оғир жиноятга қўл урди, деб ёзмоқда ЎзА Қўқон шаҳар суди судьяси Э.Ҳакимовнинг маълумотларига таянган ҳолда.

Фото: Иллюстратив сурат

Қайд этилишича, 18 ёшни қаршилаган Ж. Ўзбекистон тумани ИИБ ЙҲХБга қарашли «Шодлик» МФЙ ҳудудида жойлашган жарима майдонида сақланаётган “JAWA” русумли мотоциклни ўғрилик йўли билан олиб қочишга уринган.

У 2020 йил 2 сентябрь куни соат 02:00ларда “JAWA” русумли мотоциклни ўғирлашга ўғирлаб олиб чиқиб, йўлда кетаётганда қилган ишидан афсусланган ва ўзи яшайдиган маҳалла профилактика инспекторининг телефон рақамига қўнғироқ қилиб, жарима майдонидан мотоцикл ўғирлаб чиққанини айтиб, айбини бўйнига олган.

Профилактика инспектори тегишли ҳужжатларни расмийлаштирган. Натижада, мотоцикл жарима майдончасига қайтарилган, Ж. эса қамоққа равона бўлган.

Суд мажлисида сўралган Ж. мотоцикл минишга жуда қизиққани сабабли ушбу мотоциклни ўғирлаб чиққанини, уни шу куни миниб, кейин яна жойига олиб бориб қўймоқчи бўлганини билдирган.

“Мотоцикл эгаси эса суддан арзимаган нархдаги мотоциклини деб Ж.нинг келажагини барбод қилмасликни, агар у озодликдан маҳрум қилинадиган бўлса, ўша мотоциклини керак бўлса ёқиб юборишини, Ж. содир этган жиноят натижасида ҳеч қандай моддий зарар кўрмагани, уни кечирганини айтиб, озодликдан маҳрум қилиш билан боғлиқ бўлмаган енгилроқ жазо тайинлашни сўради.

Ж. ўзининг жиноий ҳаракатлари билан Жиноят кодексининг 267-моддаси 2-қисми «г» бандида кўрсатилган жиноятни қасддан содир этган. У Жиноят кодексида белгиланган модда санкцияси доирасида 10 йилдан 15 йилгача озодлиги маҳрум қилиниши мумкин эди.

Лекин суд Ж.га жазо тайинлашда содир этилган жиноятнинг хусусияти жабрланувчига зарар етказилмагани, унинг Ўзбекистон Миллий университети талабаси экани, спортнинг Taekvondo WTF тури бўйича эришган ютуқлари, айбини бўйнига олиш тўғрисида арз ва пушаймонлигини ҳисобга олди”, - дейилади маълумотда.

Билдирилишича, Ёшлар иттифоқи Фарғона вилоят кенгаши томонидан берилган ижобий тавсифномани ҳисобга олиб, суд ЖКнинг 57-моддасини қўллаб, модда санкциясида назарда тутилмаган озодликни чеклаш жазоси тайинлашни, Ж.га кеч соат 21:00дан эрталаб соат 6:00гача яшаш жойидан чиқмаслик, назорат қилувчи органнинг розилигисиз яшаш ва ўқиш жойини ўзгартирмаслик каби тақиқларни юклаб суд залидан дарҳол қамоқдан озод қилишни лозим топган.