ДХХ хабарига кўра, тезкор тадбир хизматнинг Фарғона вилояти бўйича бошқармаси ҳамда вилоят Ички ишлар бошқармаси ходимлари ҳамкорлигида ўтказилган.
Тадбирда Данғара туманида фаолият юритувчи турфирма ходими Умра зиёратини ташкил этиш учун тегишли лицензия мавжуд бўлмаса-да, фуқароларни Саудия Арабистонига юборишни таклиф қилгани аниқланган. У сўралган маблағнинг бир қисмини олаётганда ашёвий далиллар билан ушланган.
Ҳозирда мазкур шахсга нисбатан жиноят иши қўзғатилган, тергов ҳаракатлари давом этмоқда.
Хабарда белгиланган тартибларга риоя қилмай ташкил этилган сафарлар оқибатида айрим фуқаролар хорижда қийинчиликларга дуч келаётгани қайд этилган.
ДХХ фуқаролардан шу каби қонунбузилиш ҳолатлари ҳақида 1520 қисқа рақами орқали хабар беришни сўраган. Мурожаат қилувчининг шахси сир сақланиши кафолатланиши билдирилган.
