CGTN хабарига кўра, рекорд учун MX450 мотоцикли қуруқликда ҳам, сувда ҳам ҳаракатлана оладиган қилиб ўзгартирилган. Унга сув устида сирпанишга мўлжалланган махсус чанғилар ўрнатилган, ёнилғи баки катталаштирилган ва сувдан ҳимояси кучайтирилган.
Мотоцикл аввал қуруқликда тезлик олиб, кейин сувга чиқади. Чанғилар унинг сув юзасида ҳаракатланишига ёрдам беради, олд чанғи эса йўналишни бошқариш учун хизмат қилади.
Орқа ғилдирак бу жараёнда одатдагидан бошқача ишлайди: у қаттиқ йўлга таяниш ўрнига сувни орқага итариб, мотоциклни олдинга ҳаракатлантирувчи куч ҳосил қилади.
Рекорд масофаси дарёни бир неча бор кесиб ўтиш орқали тўпланган. Яъни Чжан Сюэ 40 километрдан ортиқ йўлни бир йўналишда босиб ўтмаган. Узоқ масофага етарли ёнилғи захираси ва сув билан такрорий контактга чидамлиликни таъминлаш учун конструкцияга қўшимча ўзгартишлар киритилган.
Биринчи уринишда атиги 20 метр юрган
Чжан Сюэ мотоциклда сув ҳавзасини кесиб ўтишга илк бор 2009 йилда уринган. Ўшанда у оддий ўзгартишлар киритилган техникада сув юзасида ҳаракатни сақлаб қолиш мумкинлигини текширган.
Дастлабки тажрибада у тўрт марта сувга қулаган, энг узоқ босиб ўтган масофаси эса атиги 20 метр бўлган. Шундан сўнг мотоцикл конструкциясини такомиллаштириш бўйича кўп йиллик тажрибалар давом этган.
Ҳозирги натижа махсус қайта жиҳозланган MX450ʼда рекорд ўрнатиш доирасида қайд этилди. Бу мотоциклнинг кундалик сув қатнови ёки мунтазам ташувлар учун тайёр эканини англатмайди: у қуруқлик ва сувда универсал фойдаланишга мўлжалланган серияли транспорт воситаси сифатида тақдим этилмаган.
