БМТ БААдан Дубай маликаси тириклигининг исботини келтиришни талаб қилди 

БМТ БААдан Дубай ҳукмдори Шайх Муҳаммад бин Рошид Ол Мактумнинг қизи, аввал қариндошлари томонидан тутқунликда ушлаб турилганини айтган малика Латифа тириклигининг исботини келтиришни талаб қилди. Дубай ҳукмдори оиласининг баёнотига кўра, малика уйида даволанмоқда.

“Унинг соғлиғи яхшиланмоқда. Биз у тегишли вақтда жамоа ҳаётига қайтишига умид қилмоқдамиз”, деб айтилган баёнотда.

БААнинг Лондондаги элчихонасида ҳам малика ўз уйида парваришланаётгани, уни оиласи ва тиббий ходимлар қўллаб-қувватлаётгани айтилган.

Аввалроқ британ нашрларидан бири малика 2018 йилда қочиб кетишга уринишидан кейин ўз яқинлари томонидан тутқунликда ушлаб турилганини айтган видеоёзувни эълон қилганди. Маликанинг сўзларига кўра, у яхтада қочишга уринганда, тутиб олиниб, унга гиёҳванд модда киритилган.    

Дубай ҳукмдорининг қизи томонидан ёзилган видео кенг музокарага ва БМТ томонидан ушбу вазият юзасидан тергов бошлашга чақирувларга сабаб бўлган. Шундан кейин БМТнинг инсон ҳуқуқлари бўйича кенгаши БААдан маликанинг тириклиги исботини келтиришни талаб қилган.

Бироқ таъкидланишича, Дубай ҳукмдори оиласи фақатгина баёнот билан чекланиб, малика тириклигига исбот сифатида унинг бирор-бир сурати ёки видеосини тақдим қилмаган.