Суҳбатдош 1984 йил Тошкент шаҳрида туғилган. 2009 йилда Туркияга келган. Истанбулда ҳозир таржимонлик ва бизнес билан шуғулланади.

Мен ҳам уй ишларидан бошлаганман

Туркияда ўзбек аёллари асосан уй ишларида ишлашади. Бола боқиш, қарияга қараш каби. Пандемия сабаб бу каби ишлар ва чет элликларни ишга олиш камайди. Чунки ҳамма ўзидан қўрқяпти. Ўзбек аёллари асосан уй ишларида ишлайди. Бунга ҳам жуда катта сабр керак. Буни ишлаганлар билади. Кўпчилик Россияда ишлаб келиб, бу ерда ҳам ишлаб кета оламан деб ўйлайди. Лекин бу нотўғри. У ерда мустақил ишлаш мумкин, яъни ишга бориб қайтиб келади. Истанбулда ундай эмас. 24 соат бир оилада қолиш ва яшаш керак. Ҳар бир оила аъзосига мослашиш талаб қилинади. Янги келинликдек гап. Лекин ундан ҳам қийинроқ.

Чунки биз танимаган муҳит, маданият, тил. Кўпчилик бу ерга тил билиб келмайди. Яъни аёлларнинг кўпчилиги тил билмай келади ва қийналади. 3 ой мослашишга ва тил ўрганишга кетади. 6 ойда мослашиб кетасизлар дейман. Лекин маблағи бор инсон бу ерга келиб анча-мунча бизнес қилса бўлади. Кўпчилик тижорат – кийим-кечак сотиш билан билан шуғулланади. Мен уй ишларидан бошлаганман. 24 соат ишлардим. Ҳафтада бир кун дам олиш бўларди. Лекин ҳозиргача ўша оилалар билан борди-келди қилиб тураман.

Ҳеч ким ўз-ўзидан чет элга чиқиб кетмайди

Иллат излаганга иллатдир дунё, ҳикмат излаганга ҳикматдир дунё дейдилар. Ниятни бошидан яхши қилиб, ҳалол пул топаман деб ҳаракат қилса ҳаммаси яхши бўлади. Ҳеч ким ўз-ўзидан чет элга чиқиб кетмайди, асосан қийинчилик сабаб четга чиқиб ишлайди. Бундан кейин камайсин, ҳамма оиласининг ёнида бўлсин. Айниқса, аёллар. Фарзандларини ташлаб кетмасин. Бу жуда қийин. Йўлидан адашганлар ҳам учраб туради.

Лекин улар сабаб ҳалол ишлаб пул топаётганларни ҳам ёмон отлиқ қилиш керак эмас. Ҳаммани бир инсонга қиёслаш хато. Мен ҳам Туркияга кетяпман деганимда, нима қиласан у ерда деб бошқача қарашган. Ҳозир ижтимоий тармоқларда саҳифаларим бор, кузатишади. Ҳавас қиладиганлар ҳам, қоралайдиганлар ҳам бор.

Сифат инсоннинг қандайлигини ҳам кўрсатади